مری: وزیراعظم شہباز شریف نے ن لیگ کے قائد نواز شریف کو مجوزہ آئینی پیکج کی بعض شقوں پر پیپلز پارٹی کی طرف سے تحفظات سمیت وفاق اور کے پی میں مولانا فضل الرحمن کیساتھ ورکنگ ریلیشن شپ کیلئے رابطوں ملاقاتوں کی تفصیلات سے بھی آگاہ کر دیا۔
ڈونگہ گلی میں ن لیگ کے قائد نواز شریف اور وزیراعظم شہباز شریف کے درمیان اہم ملاقات میں ملکی و سیاسی امور تفصیلی مشاورت کی گئی۔ پارلیمنٹ سے مجوزہ آئینی ترمیمی بل پر قانون سازی کے حوالے سے تبادلہ خیال کیا گیا، نئے چیئرمین الیکشن کمیشن کے نام پر بھی تبادلہ خیال ہوا۔
ذرائع کے مطابق وزیراعظم شہباز شریف نے پارٹی قائد کو صدر آصف زرداری سے ہونے والی ملاقات کی تفصیلات سے آگاہ کیا، دونوں رہنماوں نے بلوچستان اور کے پی میں دہشتگردی کے خاتمے پر پاک افواج کو خراج تحسین پیش کیا۔ ذرائع کا کہنا ہے کہ وزیراعلی پنجاب مریم نواز نے پارٹی قائد کو صوبے میں سیلاب کی تباہ کاریوں ،امن امان کے قیام اور مہنگائی کے خاتمے پر اقدامات سے آگاہ کیا۔
اس موقع پر قائد نواز شریف نے وزیراعظم سے گفتگو کرتے ہوئے کہا کہ ملکی سیاسی انتظامی و آئینی معاملات میں اتحادیوں کو آن بورڈ اور ان کی آرا کو مقدم رکھا جائے، سیلاب سے متاثرہ غریب عوام کا جانی مالی نقصانات کا سروے کرا کے انہیں معقول معاوضہ دیا جائے اور آئندہ سال قدرتی آفات سے نمٹنے کے لئے ایک جامع و ٹھوس لائحہ عمل مرتب کیا جائے۔
