اسلام آ باد: وفاقی وزیر منصوبہ بندی احسن اقبال نے کہا کہ 18ویں ترمیم پر اس کی روح کے مطابق عمل درآمد نہیں ہو سکا، اختیارات مرکز سے صوبوں کی طرف تو آگئے لیکن پھر آگے منتقل نہ ہوئے، ضلعی اور بلدیاتی سطح پر اختیارات تقسیم نہیں کیے گئے، صوبوں میں بہت زیادہ مرکزیت ہونے سے سروس ڈیلیوری بہت متاثر ہو رہی ہے۔
نجی ٹی وی سے گفتگو کرتے ہوئے انہوں نے کہا وفاقی اور صوبائی حکومت کے درمیان کوآرڈینیشن کی کمی نے بھی مسائل پیدا کیے، وفاق اور صوبوں کے درمیان اشتراک کا طریقہ کار اب بنانا ہوگا تا کہ مل کر ملک کے لیے کام کر سکیں۔
انہوں نے کہاہم نے تجویز دی ہے کہ کم از کم زراعت کے شعبہ میں صوبوں کے وزرا پر مشتمل ایک کمیٹی تشکیل دی جائے جس کا سیکرٹریٹ وفاق میں ہو۔ انہوں نے کہا کہ بارشوں کے باعث ہونے والے نقصان بالخصوص کسانوں کے نقصان کے ازالے کا پیکج دیا جائے گا۔
احسن اقبال نے کہا کہ چند برس میں کپاس کی پیداوار 15 لاکھ گانٹھوں سے 5 لاکھ گانٹھوں پر آ گئی ہے، پاکستان کا نجی شعبہ زراعت کی تحقیق میں سرمایہ کاری کرے، پیداوار بڑھی، اخراجات کم ہوں گے تو معیشت اور زراعت دونوں فروغ پائیں گے۔
