اسلا م آباد: سپیکر قومی اسمبلی سردار ایاز صادق کشمیریوں کی حمایت جاری رکھنے کا اعادہ کرتے ہوئے کہا ہے کہ الحاق پاکستان کی قرارداد کشمیریوں کی اجتماعی خواہش کی مظہر ہے، عالمی برادری مسئلہ کشمیر کے پرامن حل کیلئے موثر کردار ادا کرے۔
یوم الحاق پاکستان پر جاری بیان میں سردار ایاز صادق نے کشمیری عوام کی جدوجہد آزادی اور لازوال قربانیوں کو خراجِ تحسین پیش کرتے ہوئے کہا کہ 19جولائی 1947ء کا دن کشمیریوں کی پاکستان سے وابستگی کا تاریخی اظہار ہے، الحاقِ پاکستان کی قرارداد کشمیریوں کی اجتماعی خواہش کی مظہر ہے۔
انہوں نے کہا کہ بھارت کا ظلم و ستم کشمیریوں کے جذبہ آزادی کو دبا نہیں سکا، کشمیریوں کی تیسری نسل بھی اپنے حقِ خودارادیت کیلئے پرعزم ہے۔ انہوں نے کہا کہ کشمیر پاکستان کی شہ رگ ہے، پاکستان کشمیریوں کی سیاسی و اخلاقی حمایت جاری رکھے گا، پاکستانی قوم کشمیری عوام کی جدو جہد آزادی میں ان کے شانہ بشانہ کھڑی ہے۔ انہوں نے عالمی برادری سے مسئلہ کشمیر کے پرامن حل کیلئے موثر کردار ادا کرنے کا مطالبہ کیا۔
