بیجنگ (شِنہوا) مصنوعی ذہانت (اے آئی) سے متعلق الیکٹرانکس اور نئی توانائی کے مواد کی بڑھتی ہوئی طلب کے باعث چین کی بڑی صنعتی کمپنیوں کے منافع میں 2026 کے پہلے پانچ ماہ کے دوران تیزی سے اضافہ ہوا ہے ۔
قومی ادارہ شماریات (این بی ایس) کے مطابق جن صنعتی اداروں کی سالانہ کاروباری آمدن کم از کم 2 کروڑ یوآن (تقریباً 29 لاکھ 30 ہزار امریکی ڈالر) ہے، ان کا مشترکہ منافع جنوری سے مئی کے دوران 31.4 کھرب یوآن تک پہنچ گیا جو گزشتہ سال کے اسی عرصے کے مقابلے میں 18.8 فیصد زیادہ ہے۔
یہ شرح پہلے چار مہینوں کے 18.2 فیصد اضافے سے بھی زیادہ ہے۔ صرف مئی کے مہینے میں صنعتی منافع میں 21.1 فیصد اضافہ ریکارڈ کیا گیا۔
این بی ایس کے شماریات دان یو وے ننگ کے مطابق پہلے پانچ ماہ کے دوران صنعتی آمدن میں گزشتہ سال کےمقابلے میں 5.5 فیصد اضافہ ہوا جو جنوری تا اپریل کے مقابلے میں 0.3 فیصد پوائنٹس زیادہ ہے کیونکہ صنعتی پیداوار مستحکم رہی اور پیداواری اشیاء کی قیمتوں میں اضافہ جاری رہا۔
آلات سازی کا شعبہ ترقی کا اہم محرک رہا۔ اس شعبے کے منافع میں 14.1 فیصد اضافہ ہوا جس نے مجموعی صنعتی منافع میں اضافے کا 5.2 فیصد پوائنٹس کا حصہ ڈالا۔
اسی شعبے میں الیکٹرانکس کی صنعت کے منافع میں 103.9 فیصد کا غیرمعمولی اضافہ ہوا، جس نے مجموعی صنعتی منافع میں اضافے کا 43.1 فیصد حصہ فراہم کیا۔ عالمی سطح پر اے آئی کے فروغ کے باعث اعلیٰ معیار کی کمپیوٹنگ اور میموری مصنوعات کی طلب میں زبردست اضافہ دیکھنے میں آیا۔
خام مال تیار کرنے والی صنعتوں نے بھی نمایاں کارکردگی دکھائی، جہاں منافع میں 83.1 فیصد اضافہ ہوا اور اس کا مجموعی صنعتی منافع میں 10.2 فیصد پوائنٹس حصہ رہا۔
نئی توانائی اور اے آئی صنعتوں کی بڑھتی ہوئی طلب کے باعث تانبے اور ایلومینیم کی قیمتیں بلند رہیں، جس سے غیر آہنی دھاتوں کے شعبے کے منافع میں 117.1 فیصد اضافہ ہوا۔ پٹرولیم پروسیسنگ کی صنعت دوبارہ منافع بخش بن گئی جبکہ کیمیائی صنعت کے منافع میں 71.6 فیصد اضافہ ریکارڈ کیا گیا۔
اعداد و شمار کے مطابق اعلیٰ ٹیکنالوجی کی پیداوار کے شعبے نے بھی دو ہندسوں پر مشتمل ترقی برقرار رکھی، جہاں منافع میں 44.7 فیصد اضافہ ہوا اور مجموعی صنعتی منافع میں 8 فیصد پوائنٹس کا حصہ رہا۔
اس شعبے میں آپٹو الیکٹرانک آلات بنانے والی صنعت کے منافع میں 53.8 فیصد، ڈسکریٹ ڈیوائس کی پیداوار میں 40.6 فیصد جبکہ الیکٹرانک خصوصی مواد کی تیاری میں حیران کن طور پر 665.4 فیصد اضافہ ہوا۔
