اسلام آباد: حریت رہنما یاسین ملک کی اہلیہ مشعال ملک نے کہا ہے کہ1931 سے آج تک کشمیریوں کا عزم ناقابل شکست ہے، ایک دن کشمیر میں آزادی کی اذان ضرور گونجے گی، ہر کشمیری کا وعدہ ہے کہ قربانی جاری رہے گی، اذان کیلئے جان دینے والوں نے تاریخ رقم کی، حق و سچ کی فتح کا دن اب دور نہیں۔
اتوار کو یوم شہدائے کشمیر پر اپنے پیغام میں مشعال ملک نے کہا کہ 13 جولائی 1931 کو اذان مکمل کرنے کیلئے 22 کشمیریوں نے جان دے دی، کشمیریوں نے موت کو آنکھوں میں آنکھیں ڈال کر دیکھا، مگر سر نہیں جھکایا، یہ قربانیاں چیخ بن کر ابھریں جس نے آسمان و زمین کو ہلا دیا۔
انہوں نے کہا کہ 13 جولائی شہادتوں کا آغاز تھا، جو آج بھی جاری ہے، آزادی کی جدوجہد ہر کشمیری کے دل کی دھڑکن ہے، ہم خون کا آخری قطرہ بھی کشمیر کیلئے دیں گے، کشمیریوں کی قربانیاں رنگ لائیں گی۔
