لاہور: وزیر اطلاعات پنجاب عظمی بخاری نے کہا ہے کہ صحت کارڈ کے غلط استعمال بارے آڈٹ رپورٹس جلد منظر عام پر آئینگی، بلوچستان میں دہشت گردوں کیخلاف آپریشن جاری ،انسانی حقوق کے علمبردار وہاں مظالم پر آواز کیوں نہیں اٹھاتے؟۔
لاہور میں پریس کانفرنس کرتے ہوئے عظمی بخاری نے کہا کہ پنجاب حکومت کا ترجیحی ایجنڈا صحت ہے، شعبہ صحت کی ترقی کیلئے مریم نواز دن رات محنت کر رہی ہیں،صحت کارڈ پر مریضوں کا علاج اب بھی جاری ہے، صحت کارڈ بند کرنے سے متعلق پروپیگنڈا کیا گیا۔
انہوں نے کہا کہ صحت کارڈ نجی ہسپتالوں میں استعمال ہو رہا ہے، سرکاری ہسپتالوں میں صحت کارڈ کا غلط استعمال ہو رہا تھا، آڈٹ رپورٹس جلد منظر عام پر آ جائیں گی۔ ایک سوال پر انہوں نے کہا کہ پنجاب نے نہ پہلے احتجاج کی کال پر ردعمل دیا اور نہ اب دے گا۔
انہوں نے کہا کہ طوفانی بارش میں پانی کا جمع ہونا ایک قدرتی امر ہے، بارش کے پانی کی سوشل میڈیا پر شیئر کی گئیںتصویریں ڈی ایچ اے کی تھیں، ڈی ایچ اے ہمارے دائرہ اختیار میں نہیں آتا۔
انہوں نے کہا کہ بلوچستان میں روزانہ کی بنیاد پر دہشت گردوں کے خلاف آپریشن جاری ہیں،انسانی حقوق کے علمبردار بلوچستان میں مظالم پر آواز کیوں نہیں اٹھاتے۔انہوں نے کہا کہ دہشت گردی سے نمٹنے کیلئے سخت اقدامات کرنا ہوں گے۔
