منامہ: بحرین اور پاکستان نے انسداد دہشت گردی و انسانی سمگلنگ پر مشترکہ لائحہ عمل اپنانے پر اتفاق کرلیا۔ ایک روزہ دورے پربحرین کے دارالحکومت منامہ پہنچنے پر بحرین کے وزیر داخلہ جنرل شیخ راشد بن عبداللہ الخلفیہ نے پاکستانی ہم منصب محسن نقوی کا پرتپاک استقبال کیا گیا۔
وزیر داخلہ نے بحرینی وزارت داخلہ کے ہیڈکوارٹر منامہ فورٹ کا دورہ کیا، جہاں انہیں گارڈ آف آنر پیش کیا گیا۔منامہ فورٹ میں دونوں وزرائے داخلہ کے درمیان ملاقات میں دو طرفہ سکیورٹی تعاون، باہمی دلچسپی کے امور اور علاقائی و عالمی چیلنجز پر تفصیلی تبادلہ خیال کیا گیا۔
ملاقات میں دونوں ممالک کے درمیان انسداد دہشتگردی، انسداد منشیات اور انسانی سمگلنگ کے خلاف اشتراک کار کو فروغ دینے پر زور دیا گیا۔وزیرداخلہ محسن نقوی اور ان کے بحرینی ہم منصب نے مشترکہ سکیورٹی کمیٹی کے کام کو مزید موثر بنانے کے امکانات پر بات کی۔
بحرین کے وزیر داخلہ نے پاکستان اور بحرین کے مابین سیکیورٹی سمیت دیگر شعبوں میں جاری تعاون اور ہم آہنگی کو سراہتے ہوئے کہا کہ محسن نقوی کا دورہ دونوں ممالک کے درمیان سکیورٹی روابط کو مزید مستحکم کرنے کا بہترین موقع ہے۔
انہوں نے کہا کہ ہم پاکستان و بحرین کے درمیان سکیورٹی تعاون اور کوآرڈینیشن کو قدر کی نگاہ سے دیکھتے ہیں۔اس موقع پر محسن نقوی نے کہا کہ بحرین کی وزارت داخلہ اور پاکستانی وزارت داخلہ کے درمیان انسداد منشیات اور انسداد انسانی اسمگلنگ کے شعبوں میں تعاون بڑھانا وقت کی اہم ضرورت ہے۔
ملاقات کے اختتام پر وزیر داخلہ محسن نقوی نے بحرینی ہم منصب کو دورہ پاکستان کی دعوت دی۔بعد ازاں محسن نقوی نے بحرینی وزارت داخلہ میں رکھی مہمانوں کی کتاب میں اپنے تاثرات بھی قلمبند کیے۔
