بیجنگ (شِنہوا) چائنہ سٹیٹ ریلوے گروپ کمپنی لمیٹڈ (چائنہ ریلوے) نے بتایا ہے کہ سال کے پہلے 5 ماہ کے دوران چین میں ریلوے مسافروں کی آمدورفت میں مسلسل اضافہ ہوا ہے جس کے ساتھ مسافروں کی تعداد اور سروس کے معیار میں بہتری دیکھی گئی ہے۔
چائنہ ریلوے کے مطابق جنوری سے مئی کے دوران ملک بھر میں ریلوے کے ذریعے تقریباً 1.97 ارب سفری دورے ریکارڈ کئے گئے جو گزشتہ سال کے مقابلے میں 5.7 فیصد زیادہ اور ایک نیا ریکارڈ بھی ہے۔
ملک کی ویزا فری سفری پالیسی کی بدولت مسافروں کے بہاؤ میں اضافے کو مدنظر رکھتے ہوئے ریلوے نیٹ ورک نے غیر ملکی مسافروں کے سفر میں سہولت فراہم کی اور اس عرصے میں ایک کروڑ 2 لاکھ سے زائد غیر ملکی مسافروں کے سفری ریکارڈ کئے گئے جو گزشتہ سال سے 35.5 فیصد اضافہ ہے۔
اس دوران سرحد پار ریلوے سفر میں بھی اضافہ جاری رہا۔ چین-لاؤس ریلوے نے ایک لاکھ 67 ہزار مسافروں کو سہولت فراہم کی جو گزشتہ سال کے مقابلے میں 35 فیصد زیادہ ہے جبکہ گوانگ ژو-شین زین-ہانگ کانگ ہائی سپیڈ ریلوے نے ایک کروڑ 45 لاکھ 30 ہزار سرحد پار سفری دورے ریکارڈ کئے جو 14.5 فیصد اضافہ ہے۔
چائنہ ریلوے کے مطابق اس دوران کمپنی نے مقامی ثقافتی اور سیاحتی اداروں کے ساتھ مل کر سیاحت کے فروغ کے لئے ملک بھر میں ایک ہزار 400 سیاحتی ٹرینیں چلائیں۔
