بیجنگ (شِنہوا) چینی وزارت خارجہ کی ایک ترجمان نے کہا ہے کہ چین مشرق وسطیٰ میں کشیدگی میں کمی کے لئے پاکستان کی کوششوں کو سراہتا ہے اور مشرق وسطیٰ میں کشیدگی میں کمی اور دوبارہ مکالمہ شروع کرنے کی تمام کوششوں کی حمایت کرتا ہے۔ ترجمان نے تمام فریقین سے مطالبہ کیا کہ وہ جتنا جلدی ہوسکے امن عمل شروع کریں۔
ترجمان ماؤ ننگ نے یہ بات اپنی معمول کی پریس بریفنگ میں مشرق وسطیٰ کی صورتحال کے متعلق پاکستان، ترکیہ، مصر اور سعودی عرب کے وزرائے خارجہ کی ملاقات کے متعلق پوچھے گئے سوال کے جواب میں کہی۔
ترجمان نے کہا کہ ہم پاکستان کے مسلسل مصالحتی کردار کی حمایت کرتے ہیں اور ہم پاکستان سمیت تمام متعلقہ فریقین کے ساتھ رابطے اور ہم آہنگی مضبوط بنانے کے خواہاں ہیں تاکہ مشترکہ طور پر امن کو فروغ دیا جا سکے، تنازع کو ختم کیا جاسکے اور علاقائی امن و استحکام کو یقینی بنایا جا سکے۔
