چھنگدو (شِنہوا) فرانس کی دوا ساز کمپنی سانوفی نے چین کے جنوب مغربی صوبے سیچھوان کے شہر چھنگدو میں باضابطہ طور پر اپنا پہلا چائنہ انوویشن اینڈ آپریشن سنٹر قائم کر دیا ہے۔ یہ پیش رفت ملک کے اندر کمپنی کی توسیع کی سمت میں ایک بڑا قدم ہے۔
سانوفی کی ایگزیکٹو وائس پریذیڈنٹ اور بزنس آپریشنز کی سربراہ میڈیلین روچ نے کہا کہ چھنگدو میں اس مرکز کے قیام کا فیصلہ عالمی اختراع میں صف اول میں رہنے کے عزم کی عکاسی کرتا ہے۔
انہوں نے مزید کہا کہ بائیو فارماسیوٹیکل کے شعبے میں چھنگدو کا اہم کردار یہاں موجود باصلاحیت افراد اور بہترین اختراعی ماحول اسے سانوفی کی صلاحیتوں کو بڑھانے اور چین میں اپنی موجودگی کو مزید گہرا کرنے کے لئے ایک مثالی جگہ بناتا ہے۔ ان کا ماننا ہے کہ یہ اقدام مریضوں اور شراکت داروں دونوں کے لئے سود مند ثابت ہوگا۔
یہ مرکز تحقیق و ترقی اور طبی آزمائشوں سے لے کر سپلائی چین کی خدمات تک کے تمام امور کی نگرانی کرتا ہے اور 2026 کے آخر تک یہاں 600 سے زائد پیشہ ورانہ ملازمتیں فراہم کرنے کا منصوبہ ہے۔ کمپنی کے مطابق یہ نیا مرکز پہلے سے ہی بھارت، ہنگری، ملائیشیا، کولمبیا اور سپین جیسے ممالک میں موجود کمپنی کے آپریشنل مراکز کے ساتھ منسلک ہے جو ایک عالمی سطح پر مربوط اور فعال نیٹ ورک بناتا ہے۔
پیرس میں ہیڈ کوارٹر رکھنے والی کمپنی سانوفی پہلی بار 1982 میں مقامی دفتر کھول کر چینی مارکیٹ میں داخل ہوئی تھی۔ تب سے کمپنی نے چین میں اختراع اور تحقیق و ترقی کی اپنی کوششوں کو مسلسل مضبوط کیا ہے۔ اب یہ ملک بھر میں متعدد پیداواری اور تحقیقی مراکز چلا رہی ہے جن میں شنگھائی، بیجنگ، چھنگدو اور سوزو میں واقع چار آر اینڈ ڈی مرکز شامل ہیں۔ 2025 میں اس نے بیجنگ میں انسولین کی تیاری کے ایک نئے پلانٹ کا سنگ بنیاد رکھا جس میں مجموعی طور پر ایک ارب یورو (تقریباً 1.16 ارب امریکی ڈالر) کی سرمایہ کاری کی گئی ہے۔
