بیجنگ (شِنہوا) چین کی اعلیٰ عدالت نے نابالغوں سے متعلق دیوانی مقدمات کے لئے رہنما اصول جاری کئے ہیں تاکہ کم عمر افراد میں جرائم کی روک تھام کی جا سکے اور معیاری طریقہ کار کے ذریعے ان کے حقوق اور مفادات کا تحفظ کیا جا سکے۔
یہ رہنما اصول 39 دفعات پر مشتمل ہیں جو پانچ حصوں میں تقسیم ہیں اور یہ اعلیٰ عوامی عدالت کی جانب سے نابالغوں سے متعلق دیوانی مقدمات کے لئے جاری ہونے والی پہلی عدالتی دستاویز ہے۔
ان رہنما اصولوں میں ایسے مقدمات کے لئے "بچے کے بہترین مفاد” کو بنیادی اصول قرار دیا گیا ہے اور کم عمر افراد میں جرائم کی جڑ سے روک تھام کے لئے حفاظتی اقدامات کو مزید مضبوط کیا گیا ہے۔
رہنما اصولوں کے مطابق عدالتی کارروائی کے تمام مراحل میں معیاری طریقہ کار اپنایا جائے گا تاکہ نابالغوں کی مناسب رہنمائی، مدد اور ان کی نجی زندگی کے تحفظ کو یقینی بنایا جا سکے۔
ان اصولوں میں خصوصی خدمات کے لئے ایک لائحہ عمل بھی وضع کیا گیا ہے جن میں سماجی تحقیقات، نفسیاتی مشاورت، عدالتی معاونت اور خاندانی تعلیم کی رہنمائی شامل ہے جبکہ مختلف اداروں کے درمیان باہمی تعاون کی واضح ہدایات بھی دی گئی ہیں۔
یہ رہنما اصول بعد از نگرانی نظام پر بھی زور دیتے ہیں تاکہ عدالتی فیصلوں کے بعد نابالغوں کی پرورش کی نگرانی کی جا سکے اور نئے مسائل کا سامنا کرنے والوں کے لئے بروقت مداخلت یقینی بنائی جا سکے۔
