عالمی یومِ خواتین کے موقع پر ہفتہ کے روز نئی دہلی میں چینی خطاطی اور مصوری کی ایک نمائش منعقد ہوئی۔
"لانٹنگ کلچر سیلون” کے نام سے معروف چینی خطاطی اور مصوری کی اس نمائش کا اہتمام بھارت میں چین کے سفارت خانے اور سائنس و ثقافت کے روسی مرکز نے مل کر کیا تھا۔
اس تقریب میں مختلف ممالک کے سفارتکاروں کے ساتھ ساتھ فنونِ لطیفہ کے شوقین افراد، یونیورسٹی کے اساتذہ، طلبہ اور ذرائع ابلاغ کے نمائندے بھی شریک ہوئے۔
بھارت میں چینی سفارت خانے کے ناظم الامور ہی مینگ نے اپنے خطاب میں کہا کہ چینی خطاطی اور مصوری میں اظہار سے بھرپور برش ورک کو خاص اہمیت حاصل ہے جو چینی ثقافت کے گہرے ورثے کی عکاسی کرتا ہے۔
اس نمائش میں روایتی چینی فن پاروں کی متنوع جھلک پیش کی گئی۔ اس کے ساتھ ساتھ شرکاءخاص طور پر مختلف ممالک سے آنے والی خواتین کو ایک پلیٹ فارم بھی فراہم کیا گیا جس میں انہوں نے باہمی روابط کو فروغ دینے، خیالات کے تبادلے اور تہذیبوں کے ایک دوسرے سے سیکھنے کے عمل کو بڑھانے پر تبادلہ خیال کیا۔
نئی دہلی سے شِنہوا نیوز ایجنسی کے نمائندوں کی رپورٹ
