بیجنگ (شِنہوا) 2023 میں بیجنگ کے ایک ہسپتال میں لگنے والی آگ، جس میں 29 افراد ہلاک اور 42 زخمی ہوئے تھے، کے ذمہ داروں میں سے مجموعی طور پر 19 افراد کو پیر کے روز 2 سال سے لے کر 6 سال 6 ماہ تک کی قید کی سزا سنا دی گئی ہے۔
بیجنگ کی فینگ تائی ضلعی عوامی عدالت نے وانگ وین جی اور دیگر 18 افراد کے خلاف بڑے حادثے کی ذمہ داری کے الزام میں ابتدائی فیصلے سنائے۔
عدالت نے قرار دیا کہ 18 اپریل 2023 کو بیجنگ چھانگ فینگ ہسپتال میں آگ ایک تعمیراتی منصوبے سے پیدا ہونے والی چنگاریوں کے باعث بھڑکی، جس نے آتش گیر پینٹ سے پیدا ہونے والے بخارات کو آگ لگا دی۔
فیصلے میں مزید کہا گیا کہ ہسپتال کی بالائی منزلوں سے مریضوں کو موثر طریقے سے نکالنے اور انہیں منتقل کرنے میں ناکامی بھی اس حادثے کی وجہ بنی، جس کی وجہ سے 29 ہلاکتیں ہوئیں، 42 افراد زخمی ہوئے اور شدید مالی نقصان ہوا۔
عدالت نے قرار دیا کہ ملزمان نے پیداواری عمل اور کام کرنے کے دوران متعلقہ حفاظتی اقدامات کی خلاف ورزی کی، جو بڑے حادثے کی وجہ بنی، اس سے جانی نقصان ہوا اور ان کو دی جانے والی سزا قانون کے مطابق ہے۔
