ایران کے سپریم لیڈر آیت اللہ خامنہ ای نے حکومت کے حق میں ہونیوالے ملک گیر مظاہروں پر ایرانی قوم کو خراج تحسین پیش کیا، اپنے ایک بیان میں انہوں نے کہا کہ عظیم ایرانی قوم نے آج ایک تاریخی دن رقم کیا ہے اور عظیم ریلیوں نے غیر ملکی دشمنوں کی سازشوں کو ناکام بنا دیا ہے، دشمن قوتیں ایران کو عدم استحکام سے دوچار کرنے کیلئے اندرون ملک کرائے کے ایجنٹوں کو استعمال کرنا چاہتی تھیں تاہم ایرانی عوام نے ان سازشوں کو خاک میں ملا دیا ہے۔
سپریم لیڈر نے کہا کہ ایرانی قوم نے دشمنوں کے مقابلے میں اپنے عزم، شعور اور قومی شناخت کا بھرپور مظاہرہ کیا ہے۔
انہوں نے امریکا کو مخاطب کرتے ہوئے کہا کہ وہ اپنے فریبی اقدامات بند کرے اور اپنے آلہ کاروں پر انحصار کرنا چھوڑ دے، ایرانی قوم مضبوط، طاقتور اور باخبر ہے، دشمن کو اچھی طرح پہچانتی ہے اور اس کیخلاف ہمیشہ میدان میں موجود رہتی ہے۔
انہوں نے زور دیا کہ ایرانی عوام کا اتحاد اور بیداری دشمنوں کے تمام عزائم کو ناکام بنانے کیلئے کافی ہے اور یہی قوت ایران کی اصل طاقت ہے۔
