ایک سروے کے مطابق پاکستانی شہریوں کی اوسط آمدن میں 97 فیصد اضافہ ہوا ہے اور ماہانہ اوسطا آمدنی 82 ہزار روپے ہوگئی ہے۔
وفاقی ادارہ شماریات کی جانب سے جاری حکومتی ہائوس ہولڈ انٹیگریٹڈ اکنامک سروے کے مطابق گزشتہ 5 سال کے دوران شہریوں کی اوسط آمدنی میں 97 فیصد اضافہ ہوا جبکہ 2019 سے 2025 تک گھریلو اخراجات 113 فیصد بڑھ گئے ہیں، ملک میں اوسطا ماہانہ آمدن 82 ہزار اور اخراجات 79 ہزار روپے ہیں، اخراجات میں سب سے زیادہ فرنشنگ، گھریلو آلات، ہیلتھ، فوڈز، گڈز اینڈ سروسز پر ریکارڈ کئے گئے، بڑھتی ہوئی آبادی کے باعث ذاتی ملکیتی گھروں کی شرح میں کمی ریکارڈ کی گئی۔
سروے کے مطابق 2018۔19 میں 84 فیصد جبکہ موجودہ سروے میں 82فیصد لوگوں کے پاس اپنے گھر ہیں، کرایہ کے گھروں میں رہنے والوں کی تعداد 10 فیصد سے بڑھ کر 10.5فیصد ہوگئی ہے، ملک بھر میں کلین فیول کے استعمال میں اضافہ ریکارڈ ہوا ہے اور پانچ سال میں استعمال 35 فیصد سے بڑھ کر 38 فیصد ہوگیا ہے، لائٹنگ اور کوکنگ کیلئے نیچرل گیس، ایل پی جی، بائیو گیس، سولر انرجی کا استعمال بڑھ گیا ہے، ہینڈ پمپ سے پانی استعمال کرنیوالوں کی شرح 24 فیصد سے کم ہو کر 22 فیصد ہوگئی جبکہ نل سے پانی استعمال کرنیوالوں کی شرح 18فیصد سے بڑھ کر 22 فیصد ہو چکی ہے، فلٹر کا پانی استعمال کرنیوالوں کی شرح 9 فیصد سے بڑھ کر 10 فیصد ریکارڈ کی گئی۔
سروے کے مطابق ملک میں 7 فیصد آبادی ابھی تک بیت الخلا (لیٹرین)جیسی بنیادی سہولت سے محروم ہے، ڈیجیٹل پلیٹ فارم کے ذریعے آمدن میں ٹک ٹاک سب سے آگے ہے اور 88 فیصد لوگ ٹک ٹاک استعمال کرتے ہیں، یوٹیوب چینل پر وی لاگ کرنیوالے 86 فیصد لوگ ہیں۔
