آزاد جموں و کشمیر کے وزیراعظم فیصل ممتاز راٹھور نے کہا ہے کہ ہماری حکومت بننے کے بعد عوام کی مایوسی میں بے پناہ کمی آئی ہے، حکومت کا مقصد کسی سے مقابلہ نہیں بلکہ عوامی مسائل کا حل ہے، عوامی معاہدہ کے 38 نکات پر 98 فیصد عملدرآمد کرلیا ہے۔
نیوز کانفرنس کرتے ہوئے وزیراعظم فیصل ممتاز راٹھور نے کہا حکومت 11 نومبر کو بنی تھی، سوا ماہ میں ریاست کے 2 ڈویژنز میں عوامی اجتماعات کئے، سیاسی نظام پر عوام کا اعتماد ایک بار پھر بحال ہوا ہے، یہاں لوگ سڑکوں پر آئے اور مختلف تحریکوں نے جنم لیا، معاہدہ 4 اکتوبر کو ہوا اور ہماری حکومت 11 نومبر کو بنی، صرف سوا ماہ میں عوامی رابطہ بحال ہوا۔
انہوں نے کہا کہ آزاد کشمیر کے دو ڈویژنز میں بھرپور عوامی اجتماعات اور عوامی رجحان نے سیاسی نظام پر اعتماد بڑھایا، عوام نے اس حکومت کی اونرشپ لی، عوامی ایکشن کمیٹی سے ہونیوالے معاہدے پر عملدرآمد حکومت کی اولین ترجیح تھی اور تین کے بجائے حکومت نے سوا ماہ میں بیشتر نکات پر عملدرآمد کیا۔
وزیراعظم آزاد کشمیر نے کہا کہ عوامی مسائل کے حل سے ریاست میں سیاسی چہل پہل بحال ہوئی، پچھلی حکومت کے دو ڈھائی سال میں عوام اور حکومت کے درمیان فاصلہ بڑھا تھا، موجودہ حکومت نے عوام اور قیادت کے درمیان کنیکٹیوٹی بحال کی، جن سڑکوں پر سیاستدانوں کیلئے چلنا مشکل تھا، آج عوام نے استقبال کیا، ریاست بھر میں بڑے عوامی اجتماعات کئے، عوام نے حکومت کا خیرمقدم کیا، حکومت نے عوامی مفاد کے فیصلوں میں تاخیر نہیں کی، پانچویں کابینہ اجلاس اور اسمبلی سیشن میں اہم عوامی فیصلے کئے گئے۔
فیصل ممتاز راٹھور نے کہا کہ ریاست میں اعتماد کی بحالی ہماری اولین ترجیح ہے، پیپلز پارٹی مذاکرات کے ذریعے مسائل کے حل پر یقین رکھتی ہے، افراتفری اور انسانی جانوں کے ضیاع کی اجازت نہیں دینگے ۔
