وزیر اطلاعات و ٹرانسپورٹ سندھ شرجیل میمن نے کہا ہے کہ صوبائی حکومت کراچی کو ملک کا سب سے ترقیافتہ و جدید شہر بنانے کیلئے پرعزم ہے، ہر منصوبہ، ہر روپیہ، کراچی کے باشندوں کی زندگیوں میں بہتری، سہولیات اور خوشحالی کیلئے وقف ہے، چاہتے ہیں ہر شہری ہر شعبے میں ترقی کی تبدیلی محسوس کرے۔
جاری بیان میں شرجیل میمن نے کہا کہ کراچی کی ترقی کیلئے دن رات کام کررہے ہیں، سڑکوں کو بہتر بنانے کیلئے 194 ارب روپے کی سرمایہ کاری کی گئی ہے، ٹریفک کے بنیادی ڈھانچے کو بہتر بنانے کیلئے شاہراہِ بھٹو کوریڈور، ملیر ندی پل اور مختلف انڈر پاسز و فلائی اوورز پر کام جاری ہے، یہ منصوبے ٹریفک کے دبائو کو کم کریں گے اور شہر کی مجموعی آمد و رفت بھی تیز ہوگی۔
انہوں نے بتایا کہ کراچی کے اہم منصوبوں پر کام مارچ تک شروع ہو جائے گا، معیار اور وقت کی پابندی کو ہر صورت یقینی بنایا جائے گا۔
شرجیل میمن نے کہا کہ کراچی و دیگر بڑے شہروں میں 9 ڈسٹرکٹ ہیڈ کوارٹر اسپتالوں کی توسیع اور نئے میڈیکل کالجز کے قیام کیلئے 300 ارب روپے مختص کئے گئے ہیں، 155.34 ارب روپے کے بس ریپڈ ٹرانزٹ منصوبے ریڈ، ییلو اور اورنج لائن کیلئے وقف ہیں۔
انہوں نے کہا کہ حکومت کراچی کو پاکستان کا سب سے ترقی یافتہ اور جدید شہر بنانے کیلئے پرعزم ہے، ہمارا ہر منصوبہ، ہر روپیہ، کراچی کے باشندوں کی زندگیوں میں بہتری، سہولیات اور خوشحالی لانے کیلئے وقف ہے۔
انہوں نے کہا کہ ہم چاہتے ہیں کہ کراچی کے شہری ہر شعبے میں ترقی کی تبدیلی محسوس کریں۔
