ماردین، ترکیہ(شِنہوا)ترکیہ کے جنوب مشرقی صوبہ ماردین کے گورنر نے کہا ہے کہ صوبہ سیاحت اور ثقافت کے شعبے میں چین کے ساتھ قریبی تعاون کا خواہشمند ہے۔ انہوں نے اس خطے کی سلامتی، تاریخی ورثہ اور بین الاقوامی سیاحوں کے لئے بڑھتی ہوئی کشش کو اجاگر کیا۔
شِنہوا کے ساتھ ایک انٹرویو میں ماردین کے گورنر تونکے اکویون نے کہا کہ صوبائی دارالحکومت ماردین، جو شامی سرحد کے قریب واقع ہے ایک بہت محفوظ شہر ہے جو خطے کی حالیہ بے چینی سے متاثر نہیں ہوا۔
اکویون نے ماردین کو میسوپوٹیمیا کے پہاڑوں پر واقع ایک قدیم شہر قرار دیا جو اپنے گہرے تاریخی جڑوں اور ثقافتی تنوع کے لئے مشہور ہے۔ انہوں نے بتایا کہ سیاح یہاں کی منفرد پتھریلی تعمیرات اور صدیوں پرانی فضا کو آسانی سے محسوس کر سکتے ہیں۔ یہ شہر 2 ہزار سے زیادہ رجسٹرڈ تاریخی عمارتوں کا گھر ہے، جن میں مذہبی خانقاہیں، چرچ، مسجدیں اور حویلیاں شامل ہیں جو آج بھی مقامی افراد اور سیاحوں کی خدمت کرتی ہیں۔
ترکیہ کے صوبہ ماردین میں واقع دیرالزعفران خانقاہ کا فضائی منظر-(شِنہوا)
ماردین کی ترقی میں سیاحت ایک اہم ذریعہ کے طور پر ابھرتی ہوئی نظر آ رہی ہے۔ صوبہ توقع کرتا ہے کہ اس سال رات کوقیام کرنے والے تقریباً 10 لاکھ سیاح آئیں گے جبکہ اندازہ ہے کہ 2025 میں آنے والے سیاحوں کی تعداد تقریباً 30لاکھ ہوگی۔
اکویون نے چین کے ساتھ تعاون مضبوط بنانے کی اہمیت پر زور دیا۔ ماردین کے حکام نے مئی میں شنگھائی میں ایک بین الاقوامی میلے میں شرکت کی، جہاں انہوں نے زراعت، سیاحت اور صنعت کے شعبوں میں چینی شراکت داروں کے ساتھ بہت اچھی ملاقاتیں کیں۔ انہوں نے چین کے سفیر کے صوبے کے حالیہ دورے کو بھی بہت نتیجہ خیز قرار دیا۔
انہوں نے کہا ہمارا مقصد چین اور ترکیہ کے درمیان، چین اور ماردین کے درمیان تعلقات کو مضبوط بنانا ہے۔ انہوں امید ظاہر کی کہ 2026 جو ترکیہ اور چین کے سفارتی تعلقات کے قیام کی 55 ویں سالگرہ ہے، سیاحتی تبادلوں کو مزید فروغ دے گا۔
گورنر نے ایک خاص تجربے کی یقین دہانی کراتے ہوئے چینی سیاحوں کو خود آکر ماردین دیکھنے کی دعوت دی۔ انہوں نے کہا ہم تمام چینی سیاحوں کو دل کی گہرائیوں سے خوش آمدید کہتے ہیں۔
