وزیراعلی پنجاب مریم نواز نے کینسر و دل کے عارضے میں مبتلا مریضوں کے علاج کیلئے وزیراعلی سپیشل اینیشیٹو کارڈ متعارف کرانے کا فیصلہ کرتے ہوئے کہا ہے کہ تمام منصوبوں کو مقررہ ڈیڈ لائنز کے اندر فعال، مریضوں کی جانیں بچانے کیلئے کوئی کسر نہ چھوڑی جائے۔
ذرائع کے مطابق منگل کو وزیراعلی مریم نواز کی زیرصدارت اجلاس ہوا جس میں سیکرٹری سپیشلائزڈ ہیلتھ کیئر اینڈ میڈیکل ایجوکیشن نے وزیراعلی کو تفصیلی بریفنگ دی۔
وزیراعلی کو بتایا گیا کہ 17 جنوری تک نواز شریف انسٹیٹیوٹ کینسر ٹریٹمنٹ اینڈ ریسرچ لاہور کے او پی ڈی بلاک کو فعال کردیا جائے گا، بورڈ آف گورنر نے پہلے مرحلے میں 219 اسامیوں پر بھرتی کی منظوری دی ہے، نواز شریف انسٹیٹیوٹ آف کارڈیالوجی سرگودھا میں آئی پی ڈی، ایمرجنسی، پتھالویالوجی اور یڈیالوجی 31 جنوری تک مکمل فنکشنل کر دیئے جائیں گے، بورڈ آف گورنر نے پہلے فیز میں 258 آسامیوں پر بھرتی کی منظوری دی ہے۔
وزیراعلی کو بتایا گیا کہ لاہور میں جناح انسٹیٹیوٹ آف کارڈیالوجی 15فروری سے فنکشنل ہوگا، بورڈ آف گورنرزنے 1104آسامیوں پر بھرتی کی منظوری دی ہے۔
اجلاس میں کینسر اور کارڈیک سرجری کیلئے وزیراعلی سپیشل اینیشیٹو کارڈ متعارف کرانے کا فیصلہ کیا گیا جس کے تحت ہر مریض کو 10 لاکھ تک کے علاج کی سہولت حاصل ہوگی، پہلے مرحلے میں 45 ہزار مریضوں کو سی ایم سپیشل اینیشیٹو کارڈ جاری کیا جائے گا جس کے بعد یہ مریض مہنگے اور پیچیدہ علاج کے مالی بوجھ سے آزاد ہو جائیں گے، چیف منسٹر کارڈیک سرجری پروگرام کے تحت کارڈ ہولڈرز کی مفت کارڈیک سرجری کی جائے گی۔
اس موقع پر وزیراعلی نے فالج کے بروقت علاج کیلئے پلان طلب کرتے ہوئے تمام منصوبوں کو مقررہ ڈیڈ لائنز کے اندر فعال کرنے کی ہدایت کی۔
وزیراعلی نے حکم دیا کہ مریضوں کی جانیں بچانے کیلئے کوئی کسر نہ چھوڑی جائے۔
