وزیر اعظم شہباز شریف نے خصوصی افراد کے حقوق کا تحفظ، مساوی سہولیات کی فراہمی حکومتی ترجیح قرار دیتے ہوئے کہا ہے کہ تمام شعبہ ہائے زندگی میں خصوصی افراد کی شمولیت یقینی بنانا معاشرتی نظام کی افادیت، قومی ترقی کیلئے ناگزیر ہے۔
خصوصی افراد کے عالمی دن پر جاری بیان میں وزیر اعظم نے کہا کہ رواں سال یہ عالمی دن خصوصی افراد کی معاشرے میں شمولیت اور سماجی ترقی کے عنوان کے تحت منایا جا رہا ہے۔
وزیراعظم نے کہا کہ آئین پاکستان تمام شہریوں کو مساوی حقوق اور مساوی شمولیت کی ضمانت دیتا ہے، خصوصی افراد ہمارے معاشرے کی سماجی، معاشرتی اور ثقافتی اساس کا کلیدی حصہ ہیں، کسی بھی طرح کی جسمانی کمی انسانی ذہنی صلاحیتوں اور حقوق کی نفی نہیں کرتی۔
انہوں نے کہا کہ حکومت پاکستان کو خصوصی افراد کے حقوق کی اہمیت کا مکمل ادراک ہے اور ان کے تحفظ کیلئے کوشاں ہے، اس ضمن میں تمام ضروری اور موثر اقدامات اٹھائے جا رہے ہیں تاکہ خصوصی افراد کیلئے ہمدردانہ، دوستانہ اور معاون معاشرہ تشکیل دیا جا سکے۔
انہوں نے کہا کہ خصوصی افراد کے حقوق کا تحفظ اور تمام شعبہ ہائے زندگی میں ان کی شمولیت کو یقینی بنانا قومی ترقی کے لئے نا گزیر ہے۔
انہوں نے کہا کہ قانونی پس منظر میں وفاقی اور صوبائی سطح پر خصوصی افراد کے حقوق کے ایکٹ ایسے افراد کو ہر طرح کا ضروری قانونی تحفظ فراہم کرتے ہیں، یہ ایکٹ خصوصی افراد کے اندراج، معاونت، امداد و دیگر موثر خدمات سر انجام دینے کیلئے بھی بنیاد فراہم کرتے ہیں۔
وزیراعظم نے کہا کہ خصوصی افراد کے حقوق کی کونسل، سی آر پی ڈی بھی حقوق کی نگرانی اور حکومتی پالیسی اقدامات کو مضبوط کرنے میں بہت فعال طریقے سے کام کر رہی ہے، اس کے علاوہ دیگر اقدامات میں ہر 15دن بعد طبی معائنہ، خصوصی افراد کیلئے معذوری کا سرٹیفکیٹ، سہولتی آلات، ہنر مندی میں اضافہ کے انتظامات، استعداد کار بڑھانے کی تربیت، ملازمتوں میں مخصوص کوٹہ، کام کی جگہ پر باآسانی رسائی کیلئے اقدامات شامل ہیں۔
انہوں نے کہا کہ حکومت خصوصی افراد کی معاشرے میں ہر سطح اور ہر شعبے میں شمولیت یقینی بنانا چاہتی ہے، حکومت نے پالیسی اور وعدوں کو عملی جامہ پہناتے ہوئے خصوصی کاوشیں کی ہیں تاکہ خصوصی افراد کو تعلیم، صحت، روزگار اور سماجی زندگی میں ہر طرح کی شمولیت یقینی ہو تاہم اس طبقے کی بھرپور نمائندگی اور مسائل کو حل کرنے کے لئے ابھی مزید موثر اقدامات کرنے کی ضرورت ہے، اب تک اٹھائے گئے اقدامات میں خصوصی افراد کے حقوق کی کونسل کی کاوشیں قابل ستائش ہیں اور وفاقی وزارت برائے انسانی حقوق بھی خصوصی افراد کے حقوق کے تحفظ اور مضبوطی کے لیے بڑی تندہی سے کام کر رہی ہیں۔
وزیر اعظم نے کہا کہ خصوصی افراد کی بھرپور شمولیت ہی معاشرتی نظام کی افادیت اور موثر کارکردگی کا امتحان ہے اور یہ ہمیں نظام کو مزید موثر بنانے کیلئے جامع حکمت عملی بنانے کی یاد دہانی بھی کراتی ہے۔
انہوں نے کہا کہ تمام شہریوں بالخصوص کمزور اور خصوصی استعداد کے حامل طبقات کے بنیادی شہری حقوق کا تحفظ اور مساوی سہولیات کی فراہمی حکومت کی ترجیحات میں شامل ہے۔
انہوں نے کہا کہ کسی بھی امتیازی سلوک سے پاک اور سماجی عدم مساوات سے قطع نظر تمام شہریوں کی صحت اور عزت و وقار کے تحفظ کیلئے ہمارا عزم غیر متزلزل ہونا چاہئے، دن کی مناسبت سے عوام، صوبائی حکومتوں، متعلقہ نجی اداروں، سول سوسائٹی، اساتذہ اور معاشرے کے تمام سرکردہ افراد سے اپیل کرتا ہوں کہ آئیے مل کر ایسے پاکستان کی طرف پیش قدمی کریں جس میں خصوصی افراد اپنی مکمل صلاحیتوں کو بروئے کار لا کر ایک دوستانہ ہمدردانہ ماحول میں معاشرے کا فعال حصہ بن سکیں۔
