چوہنگ پولیس لاہور نے شہری کے گرنیوالے 20 لاکھ روپے ملزمان سے برآمد کر کے واپس لوٹا دیئے۔
پولیس ترجمان کے مطابق شہری ریحان 20لاکھ روپے بینک سے نکلوا کر موٹرسائیکل پر گھر جا رہا تھا کہ روڈ پر شاپر پھٹنے سے رقم گر گئی جس پر اس نے تھانے میں درخواست دی۔
ایس پی صدر رانا حسین طاہر نے ایس ایچ او چوہنگ انسپکٹر محمد رضا کی سربراہی میں ٹیم تشکیل دی جس نے سیف سٹی کیمروں سمیت تمام وسائل بروئے کار لاتے ہوئے مشکوک موٹرسائیکل سواروں کی نشاندہی کر کے ان سے تفتیش کی جن کے قبضے سے 10لاکھ روپے برآمد ہوئے بعد ازاں مزید تفتیش سے ایک اور موٹر سائیکل سوار کی نشاندہی کی گئی جس کے قبضے سے باقی ماندہ رقم 10لاکھ روپے برآمد کرلی گئی۔
ایس پی صدر رانا حسین طاہر کے مطابق مدعی مقدمہ کو 20لاکھ روپے حوالے کردیئے گئے ہیں۔
مدعی مقدمہ نے رقم برآمد کرنے پر ایس ایچ او چوہنگ انسپکٹر محمد رضا و پولیس کا شکریہ ادا کیا جبکہ ایس پی نے خصوصی ٹیم اور ایس ایچ او چوہنگ محمد رضا کو شاباش دی ،نقد انعام و تعریفی اسناد دینے کا بھی اعلان کیا۔
