کینیڈا کی عدالت نے بھارتی شہری کو کم عمر لڑکیوں کو ہراساں کرنے کا مجرم قرار دیتے ہوئے ڈی پورٹ کرنے اور کینیڈا میں دوبارہ داخلے پر پابندی عائد کردی ہے۔
غیر ملکی میڈیا کے مطابق 51 سالہ جگجیت سنگھ 6 ماہ کے ویزے پر جولائی میں نومولود پوتے سے ملنے کینیڈا گیا تھا۔
کینیڈین پولیس کے مطابق بھارتی شہری کینیڈا پہنچنے کے کچھ ہی عرصے بعد مقامی ہائی سکول کے باہر موجود سموکنگ ایریا میں باقاعدگی سے آنا شروع ہو گیا جہاں وہ بار بار نوجوان لڑکیوں کے قریب جاتا، اِن کیساتھ تصاویر لینے کی کوشش اور اِن سے غیر مناسب گفتگو کرتا۔
8 سے 11 ستمبر کے دوران اس نے متعدد بار طالبات کو ہراساں کیا اورسکول کی حدود سے باہر بھی طالبات کا پیچھا کیا۔
غیر ملکی میڈیا کے مطابق ایک کینیڈین لڑکی نے پولیس کو بتایا کہ وہ پہلے تو جگجیت سنگھ کیساتھ تصویر کھنچوانے پر راضی نہیں ہوئی لیکن اس امید پر مان گئی کہ شاید جگجیت سنگھ تصویر لینے کے بعد اسکا پیچھا چھوڑ دیگا لیکن تصویر لینے کے دوران جگجیت سنگھ لڑکی کے نہایت قریب آیا اور اس کے کندھے پر ہاتھ رکھا جس سے طالبہ خوفزدہ ہو گئی، جگجیت سنگھ کو 16 ستمبر کو گرفتار کیا گیا اور اس پر جنسی ہراسانی اور جنسی حملے کے الزامات عائد کئے گئے۔
جگجیت سنگھ کو ضمانت پر رہائی کے بعد ایک اور شکایت پر دوبارہ گرفتار کیا گیا اور انہوں نے عدالت کے سامنے طالبات کو ہراساں کرنے کا اعتراف بھی کیا۔
