ایف بی آر نے لاکھوں انکم ٹیکس گوشواروں کا آڈٹ کرنے کا فیصلہ کر لیا۔
ذرائع ایف بی آر کے مطابق شارٹ فائلر، کم ٹیکس دینے اور اصل آمدنی چھپانے والوں کا ڈیسک آڈٹ کے ذریعے سراغ لگایا جائے گا، خفیہ آمدن یا غلط گوشوارے جمع کرانے والوں کے خلاف کارروائی ہوگی، پہلے مرحلے میں 7سے 10لاکھ گوشواروں کا ڈیسک آڈٹ ہوگا اس میں تنخواہ دار اور کارپوریٹ ٹیکس دہندگان کے گوشوارے بھی شامل ہیں۔
ایف بی آر گوشواروں میں غلط بیانی اور چھپائی گئی آمدن کی نشاندہی کرے گا جبکہ بڑے سرمایہ دار، سی ای اوز اور افسران کے گوشوارے بھی زد میں آئیں گے۔
ٹیکس گوشواروں کا ڈیسک آڈٹ و تجزیہ اے آئی سمیت جدید ڈیٹا اینالیسس سسٹم سے کیا جائے گا، گوشوارے غلط ثابت ہونے پر بھاری جرمانے اور قانونی کارروائی ہوگی۔
ذرائع کے مطابق ایف بی آر نے سال 2025ء کے آڈٹ پلان کی منظوری دے دی ہے، 30نومبر تک ٹیکس گوشواروں کی تعداد 70لاکھ سے تجاوز کر سکتی ہے۔
