سرگودھا: قومی اسمبلی میں اپوزیشن لیڈر عمر ایوب نے کہا ہے کہ آزادی کی بات کا معاملہ ختم ،میڈیا نمائندگان کھل کر لکھ سکتے ہیں نہ بات کر سکتے ہیں ،موجودہ سیاسی بحران کے ذمہ دار سکندر سلطان راجہ ہیں، ہم عدالتوں میں پیش مگر قصور معلوم نہیں، پارلیمانی کمیٹی بنانے بارے خط کا جواب اب تک نہیں ملا، معاملہ لٹکانے نہیں دیں گے ۔
سرگودھا میں عدالت پیشی کے موقع پر میڈیا سے گفتگو کرتے ہوئے عمر ایوب نے کہا کہ پاکستان میں آزادی صحافت یا آزادی کی بات کرنے کا معاملہ ختم ہو چکا ہے، میڈیا نمائندگان کھل کر لکھ سکتے ہیں نہ ہی بات کر سکتے ہیں ، پیکا ایکٹ کو مکمل طور پر مسترد کرتے ہیں ، عوام اور میڈیا نمائندگان کے ساتھ کھڑے ہیں۔انہوں نے کہا کہ موجودہ حکومت کی پالیسیوں کے باعث مہنگائی میں اضافہ ہوا پی ٹی آئی کا امریکا میں اقتدار کی تبدیلی سے کوئی تعلق نہ ہی کوئی امید ہے۔
ایک سوال پر انہوںنے کہا کہ پیپلز پارٹی سندھ کے لوگوں کی لاشوں کا سودا کر کے پانی تقسیم کرنے پر راضی ہو جائے گی ۔انہوں نے کہا کہ موجودہ سیاسی بحران کے ذمہ دار سکندر سلطان راجہ ہیں، ہم عدالتوں میں پیش ہو رہے ہیں لیکن ہمارا قصور کیا ہے؟ ،یہ ہمیں معلوم نہیں ، پارلیمانی کمیٹی بنانے کیلئے میرے خط کا ابھی تک وزیراعظم کی طرف سے جواب نہیں دیا گیا ،یہ معاملے کو لٹکانا چاہتے ہیں لیکن ہم ایسا نہیں ہونے دیں گے، 8فروری کو صوابی میں بھرپور جلسہ ہوگا۔
