لاہور: پنجاب میں کھاد اور کیڑے مار ادویات کی فروخت میں اضافہ ریکارڈ کیا گیا ہے ۔ذرائع کے مطابق وزیراعلی پنجاب کسان کارڈ کی مدد سے کھاد اور کیڑے مار ادویات کی خریداری میں ریکارڈ اضافہ دیکھنے میں آیا ہے۔جائزہ رپورٹ کے مطابق 991ہزار ٹن یوریا کی فروخت میں 57.9فیصد اضافہ ہواہے جبکہ دیگر نامیاتی کھادوں کی فروخت میں بھی 42.9فی صد اضافہ ہوا۔ رپورٹ کے مطابق نائٹروجن 50.7، فاسفیٹ 9.3اور پوٹاش کی فروخت میں0.8فیصد اضافہ دیکھنے میں آیا۔
ذرائع کے مطابق پنجاب میں گندم کی بوائی کی سیٹلائٹ کے ذریعے نگرانی بھی شروع کر دی گئی ہے ،ایک کروڑ 61لاکھ گندم کی کاشت کے رقبے کی سیٹلائٹ کے ذریعے تصدیق کی جا رہی ہے، سیٹلائٹ سے لی جانے والی تصاویر کا گندم کی فصل پک کر تیارہونے پر تصاویر سے موازنہ کیا جائے گا۔
رپورٹ کے مطابق 4 لاکھ کاشتکار کسان کارڈ استعمال کرتے ہوئے کھاد، کیڑے مار ادویات سمیت اب تک 35ارب روپے کی زرعی اشیاء خرید چکے ہیں۔ ذرائع کے مطابق پنجاب کے ساڑھے 7لاکھ کسانوں میں کسان کارڈ تقسیم کئے جائیں گے، اب تک 5لاکھ 30ہزار کاشتکاروں کو کسان کارڈ جاری ہو چکے ہیں۔
