وزیراعظم شہباز شریف نے شہدائے جموں کو خراج عقیدت پیش کرتے ہوئے کہا ہے کہ بھارت سلامتی کونسل کی قراردادوں کے منافی کشمیر پر غیر قانونی قبضہ برقرار رکھے ہوئے ہے، عالمی برادری کشمیر میں انسانی حقوق کی پامالیوں پر خاموشی توڑے، عالمی سفارتی محاذ پر مسئلہ کشمیر کو اجاگر کرتے، کشمیریوں کی سیاسی، سفارتی اور اخلاقی حمایت جاری رکھیں گے۔
یوم شہدائے جموں پر جاری بیان میں وزیراعظم نے کہا کہ 6نومبر 1947ء جموں و کشمیر کی تاریخ کا وہ سیاہ دن ہے جو کشمیریوں کے ذہن پر تقریبا 8دہائیوں کے بعد بھی تازہ زخم کی طرح نقش ہے، ہر سال دنیا بھر میں موجود کشمیری اس دن کو بھارتی فوج کی کشمیریوں کی پہلی نسل کشی کی مذمت کے طور پر مناتے ہیں۔
انہوں نے کہا کہ نومبر 1947ء میں بھارتی فوج اور شدت پسندوں نے 2لاکھ 37 ہزار کشمیریوں کو بہیمانہ تشدد اور نسل کشی کا نشانہ بنایا تاکہ کشمیر کی آبادیاتی اور مذہبی اکثریت کو اقلیت میں بدلا جا سکے، بھارت کی طرف سے کشمیر میں مسلمانوں کی اکثریت کو مصنوعی طریقہ سے بدلنے کے غیر قانونی حربے آج بھی جاری ہیں،5اگست 2019ء کے اقدامات اسی سلسلے کی کڑی ہیں۔
انہوں نے کہا کہ پاکستان آزادی کی طویل جدوجہد میں کشمیریوں کی طرف سے جدوجہد آزادی میں قیمتی جانوں کے نذرانے پیش کرنے بالخصوص نومبر 1947ء میں ہزاروں کشمیریوں کی شہادت کو خراج عقیدت پیش کرتا ہے۔
وزیراعظم نے کہا کہ بھارت بین الاقوامی قوانین اور اقوام متحدہ سکیورٹی کونسل کی قراردادوں کے منافی اپنی مسلح افواج کے ذریعہ کشمیریوں پر اپنے غیر قانونی تسلط اور ناجائز قبضہ کو قائم رکھے ہوئے ہے، پاکستان اور انسانی حقوق کے تمام علمبردار اس کی بھرپور مذمت کرتے ہیں۔
انہوں نے کہا کہ بھارت کشمیر میں بنیادی انسانی حقوق، حق خود ارادیت اور عالمی قوانین کو مسلسل پامال کر رہا ہے، آج کا دن کشمیریوں کی لازوال بہادری اور جدوجہد آزادی کیلئے ان کے غیر متزلزل عزم کا مظہر ہے، آج کا دن گواہ ہے کہ کشمیریوں کی نسلوں نے بھارت کے ظلم و جبر کے آگے سر نگوں نہیں کیا بلکہ دہائیوں تک بے مثال جرت اور جوانمردی سے مقابلہ کیا اور کبھی قربانیوں سے گریز نہیں کیا۔
وزیراعظم نے کہا کہ آج کے دن حکومت پاکستان اور پاکستان کے عوام کشمیری بھائیوں اور بہنوں کی گراں قدر قربانیوں کو دلی طور پر خراج تحسین پیش کرتے ہوئے مقبوضہ کشمیر کے مظلوم عوام کے ساتھ بھرپور یکجہتی کا اظہار کرتے ہیں۔
انہوں نے کہا کہ عالمی برادری کو بھارت کی طرف سے کشمیر میں انسانی حقوق کی خلاف ورزیوں اور عالمی قوانین کی پامالی کے خلاف بھرپور آواز اٹھانی چاہئے، پاکستان کا ہر بین الاقوامی فورم پر یہ اصولی موقف ہے کہ اقوام متحدہ سلامتی کونسل کی قراردادوں اور کشمیریوں کی خواہشات کے مطابق مسئلہ کشمیر کا پرامن حل ہونا چاہئے۔
انہوں نے کہا کہ پاکستان اپنے اس عزم کا اعادہ کرتا ہے کہ عالمی سفارتی محاذ پر مسئلہ کشمیر کو اجاگر کرتا رہے گا اور کشمیریوں کی سیاسی، سفارتی اور اخلاقی حمایت جاری رکھے گا۔
