وزیراعظم شہباز شریف نے کہا ہے کہ مسئلہ جموں و کشمیر کے پرامن حل تک برصغیر میں امن واستحکام ممکن نہیں، کشمیری عوام جان لیں وہ اپنی جدوجہد میں اکیلے نہیں، 24 کروڑ پرعزم پاکستانی ان کیساتھ کھڑے ہیں۔
یوم سیاہ کشمیر پر جاری بیان میں وزیراعظم نے کہا کہ یہ انسانی تاریخ کا وہ افسوسناک باب ہے جو آج بھی جاری ہے، اس دن سے لے کر آج تک بھارت اقوام متحدہ کی سلامتی کونسل کی قراردادوں میں موجود کشمیریوں کے حق خود ارادیت کو مسلسل پامال کر رہا ہے۔
وزیراعظم نے کہا کہ بھارتی مقبوضہ جموں و کشمیر میں کشمیریوں نے 8دہائیوں سے بے پناہ مشکلات اور ظلم و بربریت کا مقابلہ کیا ہے۔
انہوں نے کہا کہ خوف اورناانصافی کے سائے میں بھی کشمیریوں کی بہادری، جراتمندی اور کسی دبا میں نہ آنے والی آزادی کی تڑپ کو ہم سلام پیش کرتے ہیں، بلاشبہ کشمیریوں کا انصاف اور حق خود ارادیت کے حصول کیلئے عزم غیر متزلزل اور دائمی ہے۔
وزیراعظم نے کہا کہ 5اگست 2019ء سے بھارت نے مقبوضہ کشمیر میں اپنی غیر قانونی اور یکطرفہ کارروائیوں میں مزید اضافہ کیا ہے جس کا مقصد مقامی آبادی کے تناسب اور سیاسی صورتحال کو تبدیل کرنا ہے۔
انہوں نے کہا کہ انسانی حقوق کی پامالی کے علاوہ بھارت نے آزادی اظہار رائے اور آزادانہ نقل و حرکت پر بھی پابندی لگا رکھی ہے، خوفناک قوانین کو لاگو کرتے ہوئے بھارت نے منظم انداز میں ظلم و بربریت اور اشتعال انگیزی کا نظام قائم کر رکھا ہے تاکہ کشمیری عوام کی جائز سیاسی آوازوں اور خواہشات کو دبایا جا سکے۔
وزیراعظم نے کہا کہ کشمیر کے نمایاں سیاسی، سماجی رہنما اورمیڈیا نمائندگان کی غیر قانونی اور بلا جواز گرفتاریاں بھارت کے پر تشدد ایجنڈے کا مظہر ہے، جھوٹے الزامات پر رہنمائوں کو مسلسل پابند سلاسل رکھنا بین الاقوامی قوانین اور انسانی حقوق کی خلاف ورزی ہے۔
وزیراعظم نے کہا کہ پاکستان نے ہمیشہ اس طرح کے غیر قانونی اقدامات کی مذمت کی ہے جو عالمی قوانین کے منافی اور اقوام متحدہ کی بے شمار قراردادوں کی خلاف ورزی کرتے ہوں۔ انہوں نے کہا کہ پاکستان مقبوضہ جموں و کشمیر کے بارے میں بہت واضح، غیر متزلزل اور اصولی موقف رکھتا ہے، اقوام متحدہ سیکیورٹی کونسل کی قراردادوں کے تحت اور کشمیری عوام کی خواہشات کے مطابق مسئلہ جموں و کشمیر کے پرامن حل کے بغیر برصغیر کا دائمی امن و استحکام محض خواب ہی رہ جائے گا۔
وزیراعظم نے کہا کہ بطور وزیراعظم میں نے ہمیشہ کشمیریوں کی حالت زار اور بھارت کے تسلط سے آزادی کیلئے ان کی آواز بین الاقوامی برادری کے سامنے رکھی ہے،کشمیری عوام کو یقین دلانا چاہتا ہوں کہ وہ اپنی اس جدوجہد میں اکیلے نہیں بلکہ 24 کروڑ پرعزم پاکستانی عوام ان کے ساتھ کھڑے ہیں۔
