اسلام آباد: وفاقی وزیرِ منصوبہ بندی احسن اقبال نے کہا ہے کہ آئندہ سال ریسکیو ٹیموں میں 30 سے 40 فیصد خواتین نظر آئیں، خوش آئند بات ہوگی ، آدھی آبادی خواتین پر مشتمل ہے، قوم کی بیٹیاں زیادہ تر شعبوں میں قوم کے بیٹوں سے آگے بڑھ کر کام کر رہی ہیں۔
پیر کووفاقی وزیرِ منصوبہ نے نیشنل ریسکیو چیلنج کی افتتاحی تقریب سے خطاب کے دوران کہا کہ وزیرِ اعظم نے آج اہم میٹنگ بلائی ہے لیکن میں وہاں سے رخصت لے کر یہاں آیا ہوں، میرے ضلع کی طرف سے بھی مجھ پر قرض تھا کہ آج میں آ کر کہوں تھینک یو 1122۔ انہوںنے کہا کہ سیلاب میں 1122 کے جوانوں نے دن رات اپنے فرائض انجام دیے، ریسکیو کے جوانوں نے کشتیوں میں لوگوں کو ریسکیو کیا، قوم کی بیٹیوں نے بھی ثابت کر دیا ہے کہ وہ قوم کے بیٹوں سے کسی بھی طرح پیچھے نہیں۔
احسن اقبال کا کہنا تھا کہ ریسکیو 1122 کا ادارہ اپنے نظام کے تحت چلتا ہے، فنی یا فنکشنل خودمختاری کی وجہ سے ریسکیو 1122 کو پھلنے پھولنے کا موقع ملا ہے، ہمارا دین سکھاتا ہے کہ ایک جان کو بچانا پوری انسانیت کو بچانے کے برابر ہے، ہمارے ریسکیورز روز کئی جانوں کو بچا کر انسانیت کو بچاتے ہیں۔
انہوں نے مزید کہا کہ ریسکیو 1122 کا ادارہ سیلاب متاثرین کے لیے امید کی کرن بنا، ریسکیو 1122 کی خدمات کو فراموش نہیں کیا جا سکتا، ریسکیو 1122 مسلسل خوب سے خوب تر کی تلاش میں بلندیوں کو چھوتا چلا جاتا ہے، نارووال میں سیلاب کے دوران امدادی کارروائیوں کا خود مشاہدہ کیا، ریسکیو میں شامل خواتین اہلکاروں نے سیلاب میں اپنی صلاحیتوں کو بھرپور طریقے سے اجاگر کیا۔
اِن کا کہنا تھا کہ 2008 میں مجھ پر قاتلانہ حملہ ہوا تو ریسکیو 1122 نے ہی مجھے اسپتال پہنچایا۔ احسن اقبال نے کہا کہ ایٹمی دھماکے کیے تو ڈاکٹر عبدالقدیر اہم منصوبے کے لیے میرے پاس آئے، میں نے ان سے پوچھا کہ ہم نے ایٹمی طاقت حاصل کی کوئی ملک ہمارے ساتھ نہیں تھا؟ کسی طرف سے بھی ہمیں کوئی امداد نہیں ملی کسی نے ہمیں سپورٹ نہیں کیا؟ پھر آپ نے کیسے اکیلے تن تنہا یہ کامیابی حاصل کی؟ ڈاکٹر عبدالقدیر نے کامیابی کا جو فارمولا شیئر کیا وہی فارمولا مجھے ریسکیو کے ادارے میں نظر آتا ہے، فارمولہ یہ ہے کہ ادارے کا سیکیورٹی گارڈ، ڈرائیور تک اپنے آپ کو ایک مشن کا حصہ سمجھتا تھا۔
احسن اقبال نے معرکہ حق پر بات کرتے ہوئے کہا کہ پاک فوج نے دشمن پرایسی کاری ضرب لگائی کہ آج مسلح افواج اور ریاست کا وقار دنیا میں بلند ہو رہا ہے۔
ان کا کہنا تھا کہ 2022 میں پاکستان کی معیشت خون میں لت پت ملی، دنیا میں شرطیں لگ رہی تھیں کہ کب پاکستان دیوالیہ ہوتا ہے مگر شہباز شریف کی قیادت میں معیشت سنبھل گئی۔ انہوں نے مزید کہا کہ کسی نے امداد یا ٹیکنالوجی فراہم نہیں کی، پھر بھی ہم اس شعبے میں کامیاب رہے۔
