اسلام آباد: وزیر اعظم شہباز شریف نے ملکی صنعتی پیداوار میں اضافے کیلئے پاور ڈویژن کو جامع و موثر پالیسی سفارشات تشکیل دینے کا حکم دیتے ہوئے کہا ہے کہ زراعت اور صنعت کے شعبے کو ہر ممکن سہولت بہم پہنچانا اولین ترجیحات میں شامل ہے۔
جاری بیان کے مطابق پیر کو وزیراعظم کی زیر صدارت پاور ڈویژن کی طرف سے ملک میں بجلی کی پیداوار اور پاور ڈویژن کے اصلاحاتی ایجنڈا پر جائزہ اجلاس کا انعقاد ہواجس میں وفاقی وزیر توانائی سردار اویس خان لغاری، وفاقی وزیر اطلاعات عطا اللہ تارڑ وفاقی وزیر اکنامک افیئرز ڈویژن احد خان چیمہ، مشیر صنعت ہارون اختر اور دیگر متعلقہ سرکاری عہدیداران اور اہلکاروں نے شرکت کی۔
اجلاس میں وزیراعظم کو پاور ڈویژن کی طرف سے ملک میں بجلی کی پیداوار اور اس کے جامع اور موثر استعمال پر ممکنہ اصلاحاتی پیکیج ، پالیسی سفارشات پر جاری کام اور دیگر اصلاحاتی ایجنڈے پر بریفنگ دی گئی۔وزیراعظم نے وزارت توانائی کو بجلی کی پیداوار کے موثر استعمال سے صنعتی پیداوار اور زرعی مصنوعات میں اضافے کیلئے جامع حکمت عملی ترتیب دینے کی ہدایت کی ۔
وزیراعظم نے سرمایہ کاروں اور صنعت کاروں کی سہولت کیلئے بھی پاور ڈویژن کو مختلف سفارشات مرتب کرنے کا حکم دیا۔
وزیراعظم نے کہا کہ زراعت اور صنعت کے شعبے کو ہر ممکن سہولت بہم پہنچانا حکومت کی اولین ترجیحات میں شامل ہے، ملک میں بجلی کی پیداوار کی زیادہ سے زیادہ مثبت استعمال یقینی بنانے کیلئے پالیسی پر کام کیا جائے۔انہوںنے کہا کہ بجلی کی پیداوار کے بہترین استعمال سے صنعتی مصنوعات اور زرعی پیداوار میں اضافہ ممکن ہے۔
