لاہور: حکومت پنجاب اور جرمن طبی ادارے نے بچوںکے کینسر کے علاج میں معاونت پر اتفاق کرلیا جبکہ وزیراعلی مریم نواز نے کہا ہے کہ پیڈریاٹرک آنکالوجی کیلئے جرمنی کی جدید ٹیکنالوجی کا خیرمقدم کریں گے، کینسر علاج کیلئے جرمن اداروں کیساتھ جوائنٹ ٹریننگ کے خاطر خواہ نتائج سامنے آئیں گے۔
ہفتے کو وزیراعلی مریم نوازسے جرمن ادارے ہوپ چلڈرن کینسر سنٹر کے اعلی سطحی وفد نے ملاقات کی جس میں بچوں کے کینسر کے علاج میں جرمن اداروں کی معاونت پر اصولی اتفاق کیا گیا۔ ہوپ چلڈرن کینسر سنٹر کے وفد کی سربراہی جرمن پیڈریاٹرک آنکالوجسٹ اورنیو رو آنکالوجسٹ ڈائریکٹر ڈاکٹر سٹیفن مائیکل نے کی، وفد میں ہائیڈل برگ یونیورسٹی ہسپتال، جرمن کینسر ریسرچ سینٹر اور ہوپ چلڈرن کینسر سینٹر کے ماہرین شامل تھے۔
وزیراعلی نے کہا کہ پنجاب کو ابلیشن کینسر ٹریٹمنٹ متعارف کرانے والاریجن کا پہلا صوبہ ہے، لاہور میں پنجاب کا سب سے بڑا اورجدید ترین نوازشریف کینسر ہسپتال تیزی سے تکمیل کے مراحل طے کررہا ہے۔ انہوں نے کہا کہ چلڈرن ہسپتال لاہور میں کینسر کے علاج کیلئے ہوپ چلڈرن کینسر سینٹر کی معاونت کو سراہا جائے گا، پیڈریاٹرک آنکالوجی کیلئے جرمنی کی جدید ٹیکنالوجی کا خیرمقدم کریں گے۔
انہوں نے کہا کہ کینسر کے علا ج کیلئے جرمن اداروں کیساتھ جوائنٹ ٹریننگ کے خاطر خواہ نتائج سامنے آئیں گے، لاہور میں نواز شریف کینسر ہسپتال تعمیر کے آخری مراحل میں ہے جو پاکستان کا سب سے بڑا اور جدید ترین ہسپتال ہوگا۔اس موقع پر ڈاکٹر سٹیفن مائیکل نے کہا کہ پنجاب میں بچوں کے کینسر کے علاج میں اعلی معیار قابل تحسین ہے، جرمن اور پاکستانی اداروں کیساتھ تربیت اور علوم کے تبادلے سے مزید مثبت نتائج سامنے آئیں گے۔
انہوں نے کہا کہ پنجاب کے چلڈرن ہسپتال اورکینسر ہسپتال میں کم وسائل کے ساتھ بہترین علاج قابل تحسین ہے، ہوپ چلڈرن کینسر سینٹر پاکستان میں آغاخان یونیورسٹی کے ساتھ کینسر کے علاج کیلئے اشتراک کار کررہا ہے۔لیڈر ہائیڈل برگ سٹی کونسل وسیم بٹ نے کہا کہ لاہور اور ہیڈلبرگ کے درمیان تعلیمی و ثقافتی روابط کو مضبوط بنا رہے ہیں۔
ہائیڈل برگ کے لارڈ میئر پروفیسر ڈاکٹر ایکارٹ ورزنر نے مہمان نوازی پر وزیراعلی پنجاب کا شکریہ ادا کرتے ہوئے کہا کہ ہائیڈل برگ اور پنجاب میں باہمی تعاون دونوں شہروں کے عوام کیلئے ایک نئے باب کا آغاز ہے۔
