لاہور: پنجاب حکومت نے سیلاب متاثرین کیلئے بحالی آپریشن شروع کرتے ہوئے فلڈ ریلیف کمیٹیاں قائم، موبائل ایپ اور مانیٹرنگ ڈیش بورڈ بنانے کا فیصلہ کرلیا۔
جمعہ کو وزیراعلی مریم نواز کی زیر صدارت خصوصی اجلاس ہوا جس میں سیلاب متاثرین کے نقصان کے ازالے ،بحالی آپریشن شروع کرنے کا فیصلہ کر کیا گیا۔ اجلاس میں ڈسٹرکٹ اور تحصیل کی سطح پر فلڈ ریلیف کمیٹیاں قائم کرنے اور متاثرین کی امداد کیلئے آسان ترین طریقہ کار واضع کرنے کی ہدایت دی گئی۔
اجلاس کو ریونیو ڈیپارٹمنٹ کی جانب سے بتایا گیا کہ پنجاب کے 27اضلاع اور 64تحصیلوں کے 3775موضع سیلاب سے متاثر ہوئے ہیں، سیلاب کے باعث 63ہزار 200پکے جبکہ 3 لاکھ 9 ہزار 684 کچے مکانات متاثر ہوئے۔اجلاس میں فیصلہ کیا گیا کہ سیلاب متاثرہ علاقوں میں سڑکوں، پلوں اور دیگر انفراسٹرکچر کی فوری بحالی کی جائے گی، سروے ٹیموں میں اربن یونٹ، ریونیو، زراعت اور آرمی کے نمائندے شامل ہوں گے۔
وزیراعلی نے ہدایت دی کہ سیلاب متاثرین کی امداد کیلئے زیادہ سے زیادہ کیمپ اور پوائنٹس قائم کئے جائیں، حکومت متاثرین تک خود پہنچے، ہر فرد کے نقصان کا ازالہ کیا جائے اور کوئی بھی ریلیف سے محروم نہ رہے۔
وزیراعلی نے ہدایت کی کہ متاثرین کیلئے سروے فارم، موبائل ایپ اور مانیٹرنگ ڈیش بورڈ بنایا جائے گا جس کی نگرانی خود کروں گی۔
