آئی سی سی نے پی سی بی کے میچ ریفری اینڈی پائی کرافٹ کو ہٹانے کے مطالبے مسترد کرنے کا فیصلہ کرلیا ہے۔
کرکٹ ویب سائٹ کی جانب سے دعوی کیا جارہا ہےکہ آئی سی سی میچ ریفری اینڈی پائی کرافٹ کو ہٹانے کی درخواست منظور نہیں کرے گا، اینڈی پائی کرافٹ ایشیا کپ میں میچ ریفری کے فرائض جاری رکھیں گے۔
کرکٹ ویب سائٹ کےمطابق آئی سی سی کے نزدیک ہینڈ شیک تنازع میں اینڈی پائی کرافٹ کا کردار نہ ہونے کے برابر ہے۔پاکستان کے میچز میں اینڈی پائی کرافٹ کی جگہ دوسرے میچ ریفری کو لگانے کی تجویزدی گئی۔
دوسری جانب پاکستان کرکٹ بورڈ کے بڑوں نے آئی سی سی کی تجویز پر مشاورت شروع کردی ہے، پاکستان کرکٹ بورڈ اے سی سی سے بھی اس حوالے سے گفتگو کرے گا، اینڈی پائی کرافٹ کو عہدے سے نہ ہٹانے تک پاکستان ایشیاء کپ کا میچ نہیں کھیلے گا۔
خیال رہے کہ گزشتہ روز پی سی بی نے میچ ریفری کو ہٹانے کا مطالبہ کیا تھا۔
