اسلام آباد: چیئرمین سینیٹ یوسف رضا گیلانی نے کہا ہے کہ بحیثیت قوم ہمارا اتحاد ہماری سب سے بڑی طاقت ہے،ماضی کی غلطیوں سے سبق سیکھ کراپنے نصب العین کا تعین ،ملک کو امن، ترقی ،خوشحالی کی راہ پر گامزن کرنے کیلئے ذاتی و اجتماعی ذمہ داریوں کو لگن کیساتھ نبھانا ہوگا۔
2025ء کے آغاز پر جاری بیان میں یوسف رضا گیلانی نے کہا کہ سال نو کا آغاز ہمیشہ نئی امیدوں، عزائم اور مقاصد کے ساتھ ہوتا ہے، یہ وقت ہے کہ ہم ماضی کی غلطیوں سے سبق سیکھیں، اپنے نصب العین کو پہچانیں اور قوم کی ترقی و خوشحالی کیلئے تمام توانائیاں وقف کریں۔
انہوں نے کہا کہ پاکستان کی عظیم قوم نے ہمیشہ مشکلات کا ڈٹ کر مقابلہ کیا ، آج بھی ہم ایسے نئے سال میں قدم رکھ رہے ہیں جو ہم سے عزم، حوصلے اور اتحاد کا تقاضا کرتا ہے، ہم سب کو اپنی ذاتی اور اجتماعی ذمہ داریوں کو پوری لگن کے ساتھ نبھانا ہوگا تاکہ ہمارا ملک امن، ترقی اور خوشحالی کی راہ پر گامزن ہو سکے۔
انہوںنے کہا کہ سال نو ہمیں یاد دلاتا ہے کہ ایک قوم کی حیثیت سے ہمارا اتحاد ہی ہماری سب سے بڑی طاقت ہے، آئیں ہم اپنے اختلافات کو پس پشت ڈال کر ایسا معاشرہ تشکیل دیں جہاں ہر فرد کو برابری، انصاف اور احترام کے ساتھ جینے کا حق حاصل ہو۔
انہوں نے کہا کہ دعا ہے نیا سال ترقی، خوشحالی ،امن کا سال ثابت ہو، اللہ قوم کو مزید کامیابیوں ،بلند مراتب سے نوازے اور ہمیں ملک کی خدمت و ترقی کیلئے کوششیں جاری رکھنے کی توفیق عطا فرمائے۔
