شنگھائی (شِنہوا) چین کے مشرقی شہر شنگھائی میں گہرے سمندر میں قائم کیا جانے والا تیرتا ہوا تحقیقی مرکز تعمیر کے مرحلے میں داخل ہوگیا، جو چین کے بڑے سائنسی تحقیقی ڈھانچے کے منصوبوں میں سے ایک ہے اور اسے سمندری آلات، سمندری وسائل اور سمندری سائنس میں تحقیق کے لئے استعمال کیا جائے گا۔
یہ سہولت شنگھائی جیاؤ تونگ یونیورسٹی کے زیرِ اہتمام تعمیر کی جا رہی ہے اور اسے 2030 تک مکمل کرنے کا پروگرام بنایا گیا ہے۔ یہ مرکزی پلیٹ فارم، جہاز پر نصب لیبارٹریوں اور ساحلی معاون نظام پر مشتمل ہے۔ لیبارٹریوں میں سمندری آفات، موسمیاتی مشاہدہ و تحقیق، سمندری زیرِ آب ماحول اور دیگر شعبے شامل ہیں۔
پلیٹ فارم نیم غوطہ خور اور دوہری ہُل والے جہاز کے ڈیزائن پر بنایا گیا ہے، جو تقریباً 100 ٹن وزن کے بڑے گہرے سمندر کے آلات کے تجربات کر سکتا ہے اور یہ سمندر میں 10 ہزار میٹر گہرائی تک سائنسی اور تجرباتی تحقیق کے لئے استعمال کیا جا سکتا ہے۔
تعمیر مکمل ہونے کے بعد یہ گہرے سمندر میں کان کنی کے نظام، اہم سمندری آلات اور سمندر میں تیل و گیس کے آلات کے لئے حقیقی سمندری تجرباتی پلیٹ فارم فراہم کرے گی، جس سے سمندری وسائل کے استعمال کی رفتار تیز ہو گی۔
