تہران (شِنہوا) ایران کے وزیر خارجہ سید عباس عراقچی نے کہا ہے کہ ایک ساحلی ریاست ہونے کے ناطے امریکہ، اسرائیل اور ان کے اتحادیوں سے وابستہ بحری جہازوں کو آبنائے ہرمز سے گزرنے سے روکنا ایران کا قانونی حق ہے۔
ایرانی وزارت خارجہ کی جانب سے جمعہ کو جاری ہونے والے اعلامیے کے مطابق وزیر خارجہ نے ان خیالات کا اظہار اقوام متحدہ کے سیکرٹری جنرل انتونیو گوتریس کے ساتھ ایک ٹیلی فونک گفتگو کے دوران کیا۔ اس گفتگو میں ایران پر امریکہ اور اسرائیل کے حملوں کے نتیجے میں پیدا ہونے والی سکیورٹی صورتحال اور انسانی بحران پر تبادلہ خیال کیا گیا۔
عراقچی نے سیکرٹری جنرل کو تنازع کی تازہ ترین صورتحال اور امریکہ و اسرائیل کے "جرائم” سے آگاہ کیا اور اس عزم کا اعادہ کیا کہ ایران اپنی قومی سلامتی، خودمختاری اور علاقائی سالمیت کے دفاع کو جاری رکھے گا۔
ایرانی وزیرِ خارجہ نے سکولوں، ہسپتالوں، ثقافتی و تاریخی عمارات، عوامی مقامات اور رہائشی علاقوں سمیت غیر عسکری اہداف پر امریکہ اور اسرائیل کے "وحشیانہ” حملوں کی شدید مذمت کی۔ انہوں نے یاد دہانی کرائی کہ جارح ممالک کی جانب سے اقوام متحدہ کے چارٹر، عالمی قوانین اور انسانی حقوق کی کھلم کھلا خلاف ورزیوں پر کارروائی کرنا اقوام متحدہ کی ذمہ داری ہے۔
عراقچی نے بعض فریقین کی جانب سے ایران کو تحمل کا مظاہرہ کرنے اور جنگ روکنے کے یکطرفہ مطالبات پر کڑی تنقید کی۔ انہوں نے واضح کیا کہ اس حقیقت کو نظر انداز نہیں کیا جانا چاہیے کہ وہ امریکہ ہی تھا جس نے اسرائیل کے ساتھ مل کر ایران کے خلاف فوجی جارحیت کا آغاز کیا۔ امریکہ نے سفارت کاری سے غداری اور خطے کی ریاستوں کی سلامتی کو داؤ پر لگا کر خطے اور دنیا پر جنگ مسلط کی ہے۔
انہوں نے مزید کہا کہ آبنائے ہرمز میں عدم استحکام براہ راست امریکہ اور اسرائیل کی "قانون شکنی اور جارحیت” کا نتیجہ ہے۔ انہوں نے ساحلی ریاست کے طور پر ایران کے اس حق کا اعادہ کیا کہ وہ امریکہ، اسرائیل یا ان کے اتحادی ممالک کے جہازوں کا راستہ روک سکتا ہے۔
عراقچی نے کہا کہ ایرانی حکام جہاز رانی کی حفاظت اور سلامتی کو یقینی بنانے کی اپنی ذمہ داریوں سے آگاہ ہیں اور اس حوالے سے ضروری اقدامات کئے گئے ہیں۔
عراقچی نے اقوام متحدہ سے مطالبہ کیا کہ وہ جارحیت پسندوں کی مذمت کرے اور انہیں جوابدہ بنا کر عالمی امن و سلامتی کا تحفظ کرے۔
اقوام متحدہ کے سیکرٹری جنرل انتونیو گوتریس نے ملکوں کی قومی خود مختاری اور علاقائی سالمیت کے احترام کی ضرورت پر زور دیا اور علاقائی تنازع کی سنگینی پر گہری تشویش کا اظہار کیا۔
