ادیس ابابا (شِنہوا) جبوتی بین الاقوامی آزاد تجارتی زون ( ڈی آئی ایف ٹی زیڈ) نے 2026 کی پہلی سہ ماہی کے دوران "شاندار نتائج” حاصل کئے ہیں کیونکہ اس کے بنیادی ترقیاتی اشاریے تیزی سے بڑھے اور اس دوران بڑی چینی کمپنیوں کی شراکت میں بھی اضافہ ہوا۔
ڈی آئی ایف ٹی زیڈ نے ایک بیان میں بتایا کہ 2026 کی پہلی سہ ماہی میں اس کے بنیادی اشاریے جیسے زمین کی فروخت، زمین کے استعمال کی شرح اور روزگار کے فروغ میں "زبردست ترقی” ہوئی، جس نے سالانہ ترقی کے لئے مضبوط آغاز کی نشاندہی کی۔
بیان کے مطابق ترقی کے اس مثبت رجحان نے جبوتی کی معاشی اور سماجی ترقی میں مضبوط تحریک پیدا کی اور مشرقی افریقہ کے تجارتی اور نقل وحمل کے منظرنامے کو بہتر بنانے کے لئے ٹھوس بنیاد رکھی۔
اعداد وشمار کے مطابق مارچ 2026 تک جبوتی بین الاقوامی آزاد تجارتی زون ( ڈی آئی ایف ٹی زیڈ) میں کل 513 عالمی کمپنیاں قائم ہو چکی ہیں جو گزشتہ سال کے مقابلے میں 22 فیصد زیادہ ہیں جبکہ زمین کے استعمال کی شرح 70 فیصد تک پہنچ گئی ہے جو پچھلے سال کی اسی مدت کے مقابلے میں 22 فیصد پوائنٹس زیادہ ہے۔
بیان میں کہا گیا ہے کہ افریقہ کے سب سے بڑے آزاد تجارتی علاقے کے طور پر ڈی آئی ایف ٹی زیڈ اپنے جغرافیائی، بنیادی سہولتوں اور پالیسی کے فوائد کی وجہ سے عالمی سرمایہ کاری کے لئے مشرقی افریقہ میں وسعت کا اہم مرکز بن گیا ہے۔
بیان میں مزید کہا گیا ہے کہ اہم چینی کمپنیاں یہاں قائم ہوگئی ہیں، جن میں اعلیٰ انجینئرنگ آلات بنانے والی کمپنیاں ایکس سی ایم جی، زوم لائن اور سانی ہیوی انڈسٹری، بھاری گاڑیاں بنانے والی معروف کمپنیاں جیسے چائنہ نیشنل ہیوی ڈیوٹی ٹرک گروپ اور نئی توانائی والی گاڑیوں کے برانڈز جیسے بی وائی ڈی اور گیلے شامل ہیں۔
ڈی آئی ایف ٹی زیڈ کے مطابق چینی کمپنیوں کے پاس طویل مدتی کرایہ پر 3 لاکھ 56ہزار مربع میٹر کی زمین ہے جو کل زمین کا 36 فیصد بنتی ہے۔ یہ علاقہ چین-افریقہ تعاون کو مزید مضبوط بنانے میں مثبت کردار ادا کرتا رہے گا۔
