ٹوکیو (شِنہوا) جاپان کے وزیرِ دفاع شنجیرو کوئزومی نے جمعہ کو کہا ہے کہ یہ انتہائی افسوسناک ہے کہ سیلف ڈیفنس فورسز (ایس ڈی ایف) کا ایک افسر جسے قانون کی پابندی اور نظم و ضبط قائم رکھنا چاہیے، جاپان میں چینی سفارت خانے میں زبردستی داخل ہونے پر گرفتار ہوا۔ انہوں نے مزید کہا کہ حقائق واضح ہونے کے بعد اس معاملے سے سختی سے نمٹا جائے گا۔
کوئزومی نے یہ بیان اس ہفتے کے آغاز میں ٹوکیو میں چینی سفارت خانے میں ایس ڈی ایف افسر کے زبردستی گھسنے کے واقعے پر پریس کانفرنس کے دوران دیا۔
سفارت خانے میں زبردستی گھسنے والے افسر کی شناخت 23 سالہ کوڈائی موراتا کے نام سے ہوئی ہے جو جاپان کی زمینی سیلف ڈیفنس فورس کا سیکنڈ لیفٹیننٹ ہے اور میازاکی پریفیکچر کے کیمپ ابینو میں تعینات ہے۔ اسے پولیس نے گرفتار کر کے غیر قانونی داخلے کے شبے میں استغاثہ کے حوالے کر دیا ہے۔
جاپان میں چینی سفارت خانے کے مطابق ایک شخص جس نے خود کو "جاپان سیلف ڈیفنس فورسز کا حاضر سروس افسر” بتایا منگل کی صبح دیوار پھلانگ کر زبردستی سفارت خانے میں داخل ہوا اور چینی سفارتی عملے کو قتل کی دھمکی دی۔
سفارت خانے نے جاپانی حکام کے سامنے سخت احتجاج اور باضابطہ شکایت درج کراتے ہوئے مطالبہ کیا ہے کہ جاپان اس معاملے کی ذمہ دارانہ وضاحت فراہم کرے۔
