امریکا نے ویزا قوانین کی خلاف ورزیوں پر کارروائی کرتے ہوئے ایک لاکھ سے زائد افراد کے ویزے منسوخ کر دئیے ہیں جن میں ہزاروں غیر ملکی طلبہ اور روزگار کیلئے آنیوالے افراد بھی شامل ہیں۔
امریکی محکمہ خارجہ کے مطابق صدر ڈونلڈ ٹرمپ کے دور صدارت کے پہلے سال کے دوران ایک لاکھ سے زیادہ ویزے منسوخ کئے گئے ہیں، ان میں کاروبار اور سیاحت کے ویزے رکھنے والے وہ افراد بھی شامل تھے جو مقررہ مدت ختم ہونے کے باوجود امریکا میں قیام پذیر رہے۔
محکمہ خارجہ نے کہا ہے کہ جن افراد کے ویزے منسوخ کئے گئے ہیں ان میں 8 ہزار طلبہ اور 2ہزار 500روزگار کیلئے آنیوالے افراد شامل ہیں۔
حکام کے مطابق زیادہ تر کیسز میں افراد کیخلاف مجرمانہ ریکارڈ یا قانونی خلاف ورزیوں کے شواہد موجود تھے، شراب نوشی کے دوران گاڑی چلانے، تشدد، چوری، بچوں سے بدسلوکی، منشیات کی تقسیم اور مالی بدعنوانی جیسے الزامات کی بنیاد پر بھی ویزے منسوخ کئے گئے ہیں۔
امریکی محکمہ خارجہ نے واضح کیا ہے کہ امریکا کو محفوظ بنانے کیلئے ویزا منسوخی اور ملک بدری کی کارروائیاں آئندہ بھی جاری رکھی جائیں گی۔
