امریکی صدر ڈونلڈر ٹرمپ نے فوجی بجٹ میں 50 فیصد اضافہ کا مطالبہ کرتے ہوئے کہا ہے کہ فوجی بجٹ بڑھا کر 1.5 کھرب ڈالر کیا جائے۔
غیر ملکی میڈیا کی رپورٹ کے مطابق انہوں نے کہا ہے کہ ملک کو انتہائی مشکل اور خطرناک حالات کا سامنا ہے اسلئے دفاعی اخراجات کو 2027 تک ایک اعشاریہ پانچ کھرب ڈالر تک کیا جائے، بجٹ موجودہ 901 ارب ڈالر سے 50 فیصد زیادہ ہوگا جس کی امریکی کانگریس نے گزشتہ سال دسمبر میں منظور ی دی تھی۔
امریکی صدر کا موقف ہے کہ یہ اضافہ امریکا کو ڈریم ملٹری بنانے کا موقع دیگا جو ملک کو ہر دشمن کے مقابلے میں محفوظ رکھے گی، صدر ٹرمپ نے خبردار کیا کہ دفاعی کمپنیوں کے سربراہان اور شیئر ہولڈرز کو کی جانیوالی بڑی ادائیگیوں کی کڑی نگرانی بھی کی جائیگی کہ آیا یہ کمپنیاں ہتھیاروں کی ترسیل تیز کرنے کیلئے اپنے وعدے پر پورا اتر رہی ہیں اور کیا یہ اس کام کیلئے نئے کارخانے قائم کر رہیں ہیں کہ نہیں۔
انکا کہنا تھا کہ امریکی دفاعی سازوسامان بنانیوالی بڑی کمپنیوں لاک ہیڈ مارٹن، نارتھروپ گرومن اور ریتھیون کے شیئرز نیویارک میں 5 فیصد سے زیادہ بڑھ گئے ہیں، معاشی ماہرین نے خبردار کیا ہے کہ امریکا کے اخراجات اور آمدنی کے درمیان فرق خطرناک حد تک بڑھ چکا ہے تاہم صدر ٹرمپ کا کہنا ہے کہ انکی حکومت آسانی سے ایک اعشاریہ پانچ کھرب ڈالر کا بجٹ پورا کر سکتی ہے کیونکہ اسے دیگر ممالک سے درآمدات پر عائد کئے جانیوالے ٹیرف سے اضافی آمدنی حاصل ہو رہی ہے۔
امریکی صدر نے کہا کہ فوجی سازوسامان کو تیزی سے تیار نہیں کیا جا رہا اسلئے کمپنیوں کو جدید اور نئے کارخانے بنانے چاہئیں، انہوں نے دفاعی کمپنیوں پر الزام عائد کیا کہ وہ بڑے پیمانے پر شیئر ہولڈرز کو ادائیگیاں درست انداز میں نہیں کر رہیں جبکہ پیداوار میں سرمایہ کاری کو بھی نظرانداز کیا جا رہا ہے۔
