سینیٹ اور قومی اسمبلی کے ارکان پر مشتمل پارلیمانی کمیٹی نے چیئرمین پیمرا کی تقرری کیلئے دو نام شارٹ لسٹ کرلئے ہیں۔
ذرائع کے مطابق کمیٹی کا اجلاس تاخیر سے شروع ہوا، ایم این اے شہباز بابر ویڈیو لنک کے ذریعے شریک رہے۔
کمیٹی میں دو اراکین قومی اسمبلی اور دو سینیٹرز شامل ہیں، اپوزیشن کے دونوں اراکین اجلاس سے غیر حاضر رہے، تحریک انصاف کے کمیٹیوں کے بائیکاٹ کے سبب سینیٹر علی ظفر نے اجلاس میں شرکت نہیں کی، شہباز بابر کو کمیٹی کا چیئرمین منتخب کیا گیا۔
اجلاس چوہدری شہباز بابر، سید رضا علی گیلانی، سینیٹر سرمد علی اور سینیٹر سید علی ظفر پر مشتمل کمیٹی نے منعقد کیا، کمیٹی کا اجلاس دسمبر میں ہونا تھا لیکن ملتوی کردیا گیا تھا۔
کمیٹی میں عنبرین جان، بریگیڈیئر (ر)انوار متین حیدر، ڈاکٹر حامد عرفان، اشرف خان کے نام کی سکروٹنی کی گئی۔
کمیٹی کے رکن سینیٹر سرمد علی نے میڈیا سے گفتگو کرتے ہوئے کہا کہ ایک آدھ دن میں نام فائنل ہوجائیگا، ابھی دو نام تجویز کئے گئے ہیں جن میں بریگیڈیئر (ر)انوار اور عنبرین جان کے نام شارٹ لسٹ کئے گئے ہیں، اگر عنبرین جان چیئرمین پیمرا مقرر ہوئیں تو وہ ملکی تاریخ میں پہلی خاتون چیئرمین ہونگی اور اگر بریگیڈئیر (ر)انوار چیئرمین پیمرا بنے تو وہ پہلے چیئرمین پیمرا ہوں گے جو بریگیڈئیر (ر)بھی رہ چکا ہے۔
دوسری جانب ذرائع کا کہنا ہے کہ کمیٹی نے چئیرمین پیمرا کیلئے عنبرین جان کا نام وزیراعظم کو بھجوا دیا ہے، وزیراعظم کے مشورے پر صدر مملکت چیئرمین پیمرا کی تقرری کی منظوری دینگے۔
