لاہور ہائی کورٹ نے پنجاب پراپرٹی بل کیخلاف درخواست چھٹیوں کے بعد متعلقہ بینچ کے روبرو لگانے کی ہدایت کر دی۔
پیر کو لاہور ہائی کورٹ میں جسٹس فیصل زمان خان نے پی ٹی آئی کے 2 ایم پی ایز کی درخواست پر سماعت کی۔
درخواست میں موقف اپنایا گیا کہ ایکٹ کے تحت جائیداد سے متعلق اختیارات انتظامیہ کو دے کر آئین کی خلاف ورزی کی گئی، ڈسپیوٹ ریزولیشن کمیٹی میں فریقین کو وکیل کے ذریعے پیش ہونے کی اجازت نہیں، سول عدالتوں کا دائرہ اختیار ختم کرنا آئین سے متصادم ہے، ایگزیکٹو اور عدالتی اختیارات کو یکجا کرنا عدلیہ کی آزادی پر حملہ ہے۔
استدعا ہے کہ پراپرٹی اونرشپ ایکٹ اور اس کے تحت ہونے والے اقدامات کالعدم قرار دیے جائیں۔
عدالت سے وکیل استفسار کیا کہ اظہر صدیق صاحب کیا اس معاملے کو سیاسی کرنا ضروری ہے؟ اتنی ٹرولنگ کے باوجود عدالت نے معاملے کو اٹھایا، آپ نے دو پی ٹی آئی کے ایم پی ایز کو لے کر درخواست دائر کی، کیا ان ایم پی ایز نے اسمبلی میں اس ایکٹ کے خلاف تقریر کی۔
عدالت نے کہا کہ یہ اسمبلی میں تو بولے نہیں یہاں درخواست دائر کر دی، آپ نے اپنی پٹیشن فیس بک پر لگا دی ہے، اس معاملے کو سیاست زدہ نہ کریں، یہ معاملہ غریب شہریوں کی جائیدادوں کا ہے۔
عدالت نے وکیل سے سوال کیا کہ آپ اس درخواست کے ذریعے حکومت کو فائدہ دے رہے ہیں، آپ کو اپنی درخواست واپس لینا چاہئے، آپ کسی متاثرہ شخص کی جانب سے درخواست دائر کرتے تو سمجھ آتی، آپ کی اس درخواست پر بہت افسوس ہوا۔
