پاکستان کے عالمی شہرت یافتہ گلوکار علی ظفر نے اپنا چوتھا میوزک البم روشنی عالمی سطح پر ریلیز کردیا ہے جس کے گانے رخسانہ نے سوشل میڈیا پر دھوم مچا دی ہے، انٹرنیٹ پر گانے کی مقبولیت میں اضافہ ہوا ہے جسے چند روز میں 30 لاکھ سے زائد ویوز مل چکے ہیں۔
12 گانوں پر مشتمل یہ البم مختلف موسیقی کے انداز کا حسین امتزاج ہے۔
البم میں علیسٹیر ایلن، طلحہ انجم، ڈی جے شاہ رخ اور علی حیدر کے تعاون سے تیار کردہ گانے بھی شامل ہیں۔
البم میں شامل آرٹسٹ نوٹ میں علی ظفر نے روشنی کو روشنی اور سایہ، خود شناسی اور جذباتی تضادات کے سفر کے طور پر بیان کیا ہے، انکے مطابق البم انسانی تجربے کی عکاسی کرتی ہے جہاں سچ کا سامنا کرنا اور پیچیدگیوں میں وضاحت تلاش کرنا، کمزوری اور امید ایک ساتھ موجود ہیں۔
البم کیساتھ رخسانہ کا میوزک ویڈیو بھی ریلیز کیا گیا ہے جسے لاس اینجلس میں فلمایا گیا ہے، ویڈیو میں صاف اور سینیمیٹک مناظر دکھائے گئے ہیں جو گانے کی دلکش دھن کیساتھ ہم آہنگ ہیں اور موسیقی اور موڈ کو مرکزی مقام دیتے ہیں۔
