چیف آف آرمی سٹاف و چیف آف ڈیفنس سٹاف فیلڈ مارشل سید عاصم منیر نے کہا ہے کہ پاکستان کی مسلح افواج آئین کے تحت تمام شہریوں کی عزت، سلامتی اور مساوی حقوق کے تحفظ کیلئے پرعزم ہیں۔
ان خیالات کا اظہار انہوں نے راولپنڈی کے کرسٹ چرچ میں منعقدہ کرسمس کی تقریبات میں شرکت کے موقع پر کیا۔
پاک فوج کے شعبہ تعلقات عامہ کے جاری بیان کے مطابق اس موقع پر فیلڈ مارشل نے مسیحی برادری کو کرسمس کی دلی مبارکباد دی، مسیحی برادری کیساتھ خوشیوں بھرے موقع کو منایا اور امن، ہم آہنگی اور خوشحالی کیلئے نیک تمنائوں کا اظہار کیا۔
اس موقع پر فیلڈ مارشل نے بانی پاکستان قائداعظم محمد علی جناح کو بھی خراج عقیدت پیش کیا اور انکے مساوات، آزادی اور مذہبی رواداری کے وژن کو اجاگر کیا۔
فیلڈ مارشل سید عاصم منیر نے اقلیتوں کے حقوق کے تحفظ کو پاکستان کے نظریہ کی بنیادی اساس قرار دیا اور چرچ میں موجود افراد سے گفتگو کرتے ہوئے قومی ترقی و سلامتی میں پاکستانی مسیحی برادری کے دیرینہ اور قابل فخر کردار کو سراہا جنہوں نے نسل در نسل پاک فوج میں نمایاں خدمات انجام دی ہیں۔
فیلڈ مارشل نے بین المذاہب ہم آہنگی، باہمی احترام اور قومی یکجہتی کی اہمیت پر زور دیتے ہوئے کہا کہ پاکستان کی اصل طاقت اسکے مساوی مواقع اور آئینی اقدار میں مضمر ہے جو مذہب، نسل، ذات اور عقیدے سے بالاتر ہیں۔
آئی ایس پی آر کے مطابق مسیحی برادری کے رہنماں نے فیلڈ مارشل کے دورے پر اظہارِ تشکر کیا، ملکی دفاع، مذہبی ہم آہنگی اور قومی اتحاد کے فروغ میں پاک فوج کے کردار کو سراہا۔
