وزیراعلی پنجاب مریم نواز نے جائیداد مقدمات 90 دن میں طے کرنے کے بل کی معطلی پر اظہار افسوس کرتے ہوئے کہا ہے کہ عدالتی فیصلہ اعلی عدلیہ کے طے کردہ مسلمہ اصولوں کے مطابق نہیں، قانون سے پہلی بار عوام کو اپنی قانونی زمین اور جائیداد کے تحفظ کی طاقت ملی، معطلی سے قبضہ مافیا کو فائدہ ہوگا۔
جاری بیان میں مریم نواز نے کہا کہ ہم نے برسوں اور دہائیوں کے ستائے ہوئے لاکھوں اہل پنجاب کی مدد کا قانون (پنجاب پروٹیکشن آف اونرشپ آف اِمووبل پراپرٹی بل 2025ئ) بنایا مگر اسے معطل کردیا گیا، عدالتی فیصلہ اعلی عدلیہ کے طے کردہ مسلمہ اصولوں کے مطابق نہیں۔
انہوں نے کہا کہ اس قانون سے پہلی بار عوام کو اپنی قانونی زمین اور جائیداد کے تحفظ کی طاقت ملی، قانون کی معطلی سے قبضہ مافیا کو فائدہ ملے گا، عوام اسے قبضہ مافیا کی پشت پناہی سمجھیں گے۔
انہوں نے کہا کہ یہ قانون مظلوم عوام کو تحفظ دیتا ہے، اس میں انتظامی اور قانونی تمام پہلوئوں کو جامع انداز میں شامل کیا گیا۔
مریم نواز نے کہا کہ زمینوں کے مقدمات میں دہائیوں اسٹے آرڈر چلتے ہیں، یہ قانون مریم نواز کے فائدے کیلئے نہیں تھا، قانون کی معطلی سے ہماری ذات کو کوئی نقصان نہیں ہوا تاہم قبضہ اور لینڈ مافیا کے ستائے غریبوں، مسکینوں، بے کسوں، بیوائوں اور مظلوموں کا بڑا نقصان ضرور ہوا ہے۔
انہوں نے کہا کہ قانون سازی کرنا صوبائی اسمبلی کا آئینی حق ہے جس سے اسے روکا نہیں جا سکتا۔
