گورنر خیبر پختونخوا فیصل کریم کنڈی نے کہا ہے کہ گورنر راج لگنے کا دارومدار صوبائی حکومت کے کردار پر ہے، وفاق سے تعاون کے بغیر صوبہ نہیں چل سکتا، فوج نکل گئی تو دو دن صوبہ نہیں سنبھالا جا سکتا، سندھ اور پنجاب ایک دوسرے سے منصوبوں کا مقابلہ کر رہے، ہم امن کیلئے رو رہے ہیں، صوبہ بند اور احتجاج کرنا ہے تو وفاق سے مسائل کا مقدمہ کون لڑے گا؟۔
نجی ٹی وی سے گفتگو کرتے ہوئے فیصل کریم کنڈی نے کہا کہ صوبائی حکومت ریاست کیساتھ ملکر کام نہیں کرتی تو گورنر راج کا خطرہ ہے، میرے خیال میں صوبے میں جو بھی حکومت آئے گی وہ پی ٹی آئی سے بہتر کارکردگی دکھائے گی۔
آئین میں گورنر راج کی شق ہے، یہ غیر آئینی نہیں، گورنر راج لگنے کا دارومدار صوبائی حکومت کے کردار پر ہوتا ہے۔
انہوں نے کہا کہ یہ لوگ کہتے ہیں فوج صوبے سے نکل جائے، اگر فوج نکل جائے تو ہماری صلاحیت نہیں کہ دو تین دن صوبہ سنبھال سکیں، انٹیلی جنس بیسڈ آپریشن کی حمایت اور وفاق سے تعاون کے بغیر صوبہ نہیں چل سکتا۔
انہوں نے کہا کہ بانی پی ٹی آئی اپنے اعمال کی سزا بھگتنے کے بعد ہی باہر نکلیں گے۔
انہوں نے کہا کہ سندھ اور پنجاب ایک دوسرے سے منصوبوں کا مقابلہ کر رہے ہیں جبکہ ہم امن کیلئے رو رہے ہیں، صوبہ بند کرنا اور احتجاج کرنا ہے تو وفاق سے مسائل کا مقدمہ کون لڑے گا۔
انہوں نے کہا کہ وزیراعلی اپنے ضلع خیبر میں بیٹھیں، دہشت گردی اور منشیات کو کنٹرول کریں، خیبر پختونخوا میں ایک پولیس اسٹیشن نہیں بنا، پولیس کی تربیت نہیں کی گئی اور انہیں جدید اسلحہ بھی فراہم نہیں کیا گیا۔
