پاکستان نے برطانیہ سے پی ٹی آئی رہنماء شہزاد اکبر اور یوٹیوبر عادل راجہ کی حوالگی کا مطالبہ کردیا۔
جمعرات کو وفاقی وزیر داخلہ محسن نقوی نے برطانوی ہائی کمشنر جین میریٹ سے ملاقات کی جس میں دوطرفہ تعلقات، سیکیورٹی تعاون اور باہمی دلچسپی کے مختلف امور پر تفصیلی تبادلہ خیال کیا گیا۔
ملاقات میں برطانیہ میں غیر قانونی طور پر مقیم پاکستانیوں کی وطن واپسی سے متعلق معاملات پر بھی گفتگو ہوئی، وزیر داخلہ نے شہزاد اکبر اور عادل راجہ کی حوالگی کیلئے ایکسٹروڈیشن کے کاغذات باضابطہ برطانوی ہائی کمشنر کے حوالے کرتے ہوئے کہا کہ دونوں افراد پاکستان میں مختلف مقدمات میں مطلوب ہیں لہٰذا انہیں جلد پاکستان کے حوالے کیا جانا ضروری ہے۔
وزیر داخلہ نے بیرون ملک بیٹھ کر ریاست اور اداروں کیخلاف پروپیگنڈا کرنیوالے پاکستانی شہریوں کیخلاف ٹھوس ثبوت فراہم کرتے ہوئے کہا کہ پاکستان میںآزادی اظہار کا احترام کیا جاتا ہے مگر فیک نیوز ہر ملک کیلئے سنگین مسئلہ ہے، کسی بھی ریاست میں بیرونِ ملک سے لگائے جانے والے بے بنیاد الزامات اور ہرزہ سرائی کو برداشت نہیں کیا جاتا۔
انہوں نے کہا ہے کہ پاکستان مخالف پروپیگنڈا کرنے والوں کی واپسی کیلئے برطانوی تعاون قابل قدر ہوگا۔
انہوں نے بتایا کہ وزارتِ خارجہ کے ذریعے بھی ایکسٹروڈیشن کا باضابطہ عمل شروع کر دیا گیا ہے ۔
