وزیراعلیٰ سندھ سید مراد علی شاہ نے کہا ہے کہ کسی بھی سماجی ترقی کا معیار صرف معاشی اعداد و شمار سے نہیں۔ سماجی ترقی، ہمدردی اور مساوی مواقع سے ناپا جاتا ہے، خصوصی افراد کیلئے حکومتی ملازمتوں میں 5 فیصد کوٹہ سختی سے نافذ ہے، صرف پالیسیاں کافی نہیں، ثقافتی رویوں میں تبدیلی ضروری ہے، خصوصی افراد کیلئے رکاوٹوں سے پاک معاشرہ بنانا مشترکہ ذمہ داری ہے۔
کراچی میں تقریب سے خطاب کرتے ہوئے انہوں نے کہا کہ سندھ حکومت نے ڈپارٹمنٹ آف دی پرسن وتھ ڈس ایبلٹیز مستحکم کیا ہے، حیدرآباد، لاڑکانہ، شہید بینظیر آباد میں بھی معاون آلات کی تقسیم کئے ہیں، وہیل چیئرز، ٹرائی سائیکلز اور سماعتی آلات سے ہزاروں افراد مستفید ہوئے ہیں، پیپلز پارٹی نے کورنگی میں پاکستان کا سب سے بڑا سینٹر آف ایکسیلنس قائم کیا ہے جس میں آئی ٹی، ٹیکسٹائل اور وہیل چیئر مینوفیکچرنگ کی تربیت دی جارہی ہے، وہیل چیئر مینوفیکچرنگ اور ہنر مند تربیت سندھ حکومت کا بڑا قدم ہے، خصوصی نوجوان اسپورٹس، کاروبار اور ٹیکنالوجی میں نمایاں کردار ادا کر رہے ہیں، خصوصی اولمپکس میں بھی ہمارے نوجوانوں کامیابیاں حاصل کر رہے ہیں۔
