وزیراعلی پنجاب مریم نواز نے ‘اعزازیہ کارڈ برائے امام مسجد صاحب’ کی منظوری دیتے ہوئے فورتھ شیڈول جرائم پیشہ افراد کی ڈیجیٹل نگرانی کیلئے اقدامات اٹھانے، غیرقانونی مقیم افغانون کیخلاف آپریشن مسلسل جاری رکھنے کا حکم دیدیا۔
ذرائع کے مطابق بدھ کو وزیراعلی پنجاب مریم نواز کی زیر صدارت اجلاس کا انعقاد ہوا جس میں ‘اعزازیہ کارڈ برائے امام مسجد صاحب’ کی منظوری دیتے ہوئے فروری 2026 تک کارڈ کے اجرا کی ڈیڈ لائن مقرر کر دی۔
وزیراعلی نے کہا کہ پہلی ادائیگی یکم جنوری سے بذریعہ پے آرڈر ہوگی جبکہ یکم فروری سے ‘اعزازیہ کارڈ برائے امام مسجد صاحب’ٔ کے ذریعے ادائیگی کی جائے گی۔
وزیراعلی نے آئمہ کرام کی رجسٹریشن کا عمل مسلسل جاری رکھنے کی ہدایت کرتے ہوئے کہا کہ پنجاب بھر میں آئمہ کرام کے 62994رجسٹریشن فارم وصول ہو چکے جن کی تصدیق کا عمل جاری ہے۔
انہوں نے کہا کہ ملک و قوم کے مفادات کے خلاف اور اخلاقی یا مالی جرائم میں ملوث امام مسجد کا اعزازیہ بند کر دیا جائے گا۔
انہوں نے بتایا کہ صوبے بھر میں مسجد مینجمنٹ کمیٹیاں اور تحصیل مینجمنٹ کمیٹیاں قائم کر دی گئی ہیں،اسسٹنٹ کمشنرز ہر ماہ آئمہ کرام کو مدعو کر کے میٹنگ کریں۔
انہوں نے حکم دیا کہ حساس ایریا میں مسلسل کومبنگ آپریشن جاری رکھا جائے اور فورتھ شیڈول جرائم پیشہ افراد کی ڈیجیٹل نگرانی کیلئے ضروری اقدامات اٹھائے جائیں۔ انہوںنے غیر قانونی مقیم افغانون کیخلاف آپریشن مسلسل جاری رکھنے کا حکم دیا۔
اجلاس میں سیف سٹی کیمروں ،سرکاری املاک کو نقصان پہنچانے والوں کیخلاف سخت کارروائی کیلئے قانون سازی کا فیصلہ کیا گیا۔
