وفاقی وزیر داخلہ محسن نقوی نے کہا ہے کہ ملکی ساکھ پر سمجھوتہ ناممکن، نامکمل، جعلی دستاویزات پر سفر کی اجازت نہیں دینگے۔
مکمل سفری دستاویزات کے حامل کسی مسافر کو سفر سے روکا نہیں جارہا تاہم وطن کی بدنامی کا باعث بننے والے کسی مسافر کو سفر کی اجازت نہیں دی جاسکتی۔
منگل کو محسن نقوی نے لاہور ایئرپورٹ کا دورہ کیا اور مسافروں کے امیگریشن عمل کا جائزہ لیا اس موقع پر ڈائریکٹر ایف آئی اے علی ضیا اور متعلقہ حکام بھی موجود تھے۔
وزیر داخلہ نے امیگریشن کائونٹرز پر مسافروں کی ٹریول ہسٹری کو شناختی کارڈز اور پاسپورٹس سے منسلک کرنے کے نظام کا مشاہدہ کیا۔
اس موقع پر مسافروں نے امیگریشن پراسیس پر اطمینان کا اظہار کیا اور ایف آئی اے عملے کی تعریف کرتے ہوئے بتایا کہ صرف 2منٹ میں امیگریشن کا عمل مکمل ہوا ہے، وزیر داخلہ کے دوروں سے پراسیس پہلے سے زیادہ بہتر ہوا ہے۔
وزیرداخلہ نے تیز رفتار سسٹم پر ڈائریکٹر ایف آئی اے اور ان کی ٹیم کی کارکردگی کو سراہا۔ انہوںنے واضح کیا کہ مکمل سفری دستاویزات کے حامل کسی مسافر کو سفر سے نہ روکا جا رہا ہے اور نہ ہی روکا جائے گا، تاہم نامکمل یا جعلی دستاویزات کے حامل مسافر کو ہرگز سفر کی اجازت نہیں دی جائے گی۔
