وزیراعلی خیبرپختونخوا نے مقامی آبادی کو معدنیات و توانائی منصوبوں سے براہِ راست استفسادے کو حکومتی ترجیح قرار دیتے ہوئے کہا ہے کہ مقامی آبادی کو فائدہ پہنچانے والی نجی سرمایہ کاری کی مکمل حوصلہ افزائی کریں گے، سستی و صاف توانائی کیلئے چھوٹے پن بجلی گھروں، ڈیموں کی تعمیر جاری ہے۔
منگل کو وزیر اعلی سہیل آفریدی سے امریکی قونصل جنرل تھامس ایکرٹ نے ملاقات کی جس میں تجارت، سرمایہ کاری، معدنیات، توانائی ،سیکیورٹی تعاون، انسدادِ دہشت گردی و منشیات پر تفصیلی تبادلہ خیال کیا گیا۔
ملاقات میں عالمی تجارت کے فروغ کیلئے بزنس اینڈ انویسٹمنٹ روڈ شو کرانے کی تجویز سامنے آئی جبکہ قیمتی و نایاب معدنیات کے لیز ہولڈرز کو روڈ شو میں مدعو کرنے کی تجویز پر بھی غور گیا گیا۔
وزیر اعلی سہیل آفریدی نے کہا کہ خیبر پختونخوا منرلز ایکٹ کے تحت مقامی آبادی کو سرمایہ کاری میں اولین ترجیح حاصل ہے، مقامی آبادی کو فائدہ پہنچانے والی نجی سرمایہ کاری کی مکمل حوصلہ افزائی، سہولت فراہم کریں گے۔
انہوں نے کہا کہ عوامی مفاد صوبائی حکومت کی اولین ترجیح ہے، صوبائی حکومت سستی اور صاف توانائی کیلئے چھوٹے پن بجلی گھروں اور ڈیموں پر کام کر رہی ہے۔
انہوں نے کہا کہ نائن الیون کے بعد دہشتگردی کیخلاف جنگ میں خیبر پختونخوا سب سے زیادہ متاثر ہوا، اب صوبائی حکومت انفرااسٹرکچر، ادارہ جاتی مضبوطی اور استعداد سازی پر کام کر رہی ہے، ضم شدہ اضلاع میں نایاب معدنی ذخائر سے مقامی آبادی کو براہ راست فائدہ دیا جائے گا۔
اس موقع پر امریکی قونصل جنرل تھامس ایکرٹ نے کہا کہ تجارتی سفارتکاری امریکی خارجہ پالیسی کا مرکزی ستون ہے، اقتصادی سفارتکاری کے فروغ سے مجموعی امن و استحکام کو تقویت ملے گی، معدنیات اور توانائی کی شراکت داری اقتصادی سفارتکاری کو مضبوط کرے گی۔
